தமிழக அரசு ஊழியர்களுக்கு ஒரு மிக முக்கியமான மற்றும் அதிரடியான செய்தி வெளியாகியுள்ளது. அரசுப் பணியில் இருப்பவர்கள் தங்களின் சொத்து விவரங்களை முறையாகத் தாக்கல் செய்தால் மட்டுமே இனி பதவி உயர்வு வழங்கப்படும் என்று தமிழக அரசு அதிரடி உத்தரவு பிறப்பித்துள்ளது.
வரும் அக்டோபர் 31-ஆம் தேதிக்குள் தங்களின் அசையும் மற்றும் அசையா சொத்துக்கள் குறித்த முழு விவரங்களையும், மாநில அரசின் ஒருங்கிணைந்த நிதி மற்றும் மனிதவள மேலாண்மை அமைப்பு, அதாவது IFHRMS போர்ட்டலில் பதிவேற்ற வேண்டும் என்று தலைமைச் செயலாளர் சாய் குமார் அவர்கள் உத்தரவிட்டுள்ளார். இந்த உத்தரவு தற்போது அரசு ஊழியர்கள் மத்தியில் பெரும் சலசலப்பை ஏற்படுத்தியுள்ளது.
இந்த புதிய உத்தரவின்படி, அரசு ஊழியர்கள் தங்களின் பெயரில் உள்ள சொத்துக்கள் மட்டுமல்லாமல், தங்களைச் சார்ந்த குடும்ப உறுப்பினர்கள் அல்லது மற்ற நபர்களின் பெயரில் வாங்கியுள்ள சொத்துக்கள், சேமிப்புகள் மற்றும் வாங்கியுள்ள கடன்கள் என அனைத்து விவரங்களையும் வெளிப்படையாகத் தெரிவிக்க வேண்டும்.
குறிப்பாக, பினாமி பெயர்களில் சொத்துக்கள் வாங்கியிருந்தால், அந்த நபருக்கும் உங்களுக்கும் உள்ள உறவு முறை என்ன என்பதையும் கட்டாயமாக விளக்க வேண்டும் என்று அரசு அறிவுறுத்தியுள்ளது. இந்தத் தகவல்களை வழங்கத் தவறும் ஊழியர்களின் பெயர்கள், பதவி உயர்வுக்கான பட்டியலில் சேர்க்கப்படாது என்று அரசு திட்டவட்டமாகத் தெரிவித்துள்ளது.
அரசு ஊழியர்கள் தங்களின் சொத்து விவரங்களை மறைப்பது, அரசு ஊழியர் நடத்தை விதிகளை மீறுவதாகக் கருதப்படும் என்றும், இதற்குத் துறை ரீதியான நடவடிக்கைகள் எடுக்கப்படும் என்றும் எச்சரிக்கை விடுக்கப்பட்டுள்ளது.
உண்மையில், இது போன்ற ஒரு நடைமுறை கடந்த 2010-ஆம் ஆண்டிலேயே ஓய்வுபெற்ற நீதிபதி ஏ.கே.ராஜன் தலைமையிலான குழுவின் பரிந்துரையின் பேரில் கொண்டுவரப்பட்டது.
ஆனால், அந்த நேரத்தில் இது முறையாகச் செயல்படுத்தப்படவில்லை. இப்போது பினாமி சொத்துக்கள் உட்பட அனைத்து விவரங்களையும் கட்டாயமாக்கியிருப்பது, ஊழலைக் கட்டுப்படுத்த அரசு எடுக்கும் ஒரு பெரிய முயற்சியாகப் பார்க்கப்படுகிறது.
இந்தத் திடீர் உத்தரவு, பல ஆண்டுகளாகப் பதவி உயர்வுக்காகக் காத்திருக்கும் ஊழியர்கள் மத்தியில் ஒருவிதமான கவலையை ஏற்படுத்தியுள்ளது. குறிப்பாக, சொத்து விவரங்களை ஆன்லைனில் பதிவேற்றுவதில் உள்ள நடைமுறைச் சிக்கல்கள் மற்றும் தனிப்பட்ட ரகசியங்கள் குறித்த அச்சம் ஊழியர்களிடையே நிலவுகிறது.
.இருப்பினும், நிர்வாகத்தில் வெளிப்படைத்தன்மையைக் கொண்டுவரவும், லஞ்ச ஊழலை ஒழிக்கவும் இந்த நடவடிக்கை அவசியம் என்று சமூக ஆர்வலர்கள் வரவேற்கின்றனர்.
காலக்கெடு முடிய இன்னும் சில நாட்களே உள்ள நிலையில், அரசு ஊழியர்கள் தங்களின் சொத்து விவரங்களைத் திரட்டும் பணியில் தீவிரமாக இறங்கியுள்ளனர். இந்த அதிரடி மாற்றம் அரசு நிர்வாகத்தில் எந்த மாதிரியான தாக்கத்தை ஏற்படுத்தும் என்பதை நாம் பொறுத்திருந்துதான் பார்க்க வேண்டும்.
