நடுக்கடலில் சென்று கொண்டிருக்கும் பிரம்மாண்டமான சரக்குக் கப்பல்களை, எங்கோ ஒரு மூலையில் அமர்ந்துகொண்டு ஹேக்கர்கள் தங்கள் கட்டுப்பாட்டுக்குள் கொண்டுவரும் அதிர்ச்சியான சம்பவம் தற்போது நிஜத்திலேயே அரங்கேறியுள்ளது.
அமெரிக்காவை நோக்கிச் சென்று கொண்டிருந்த இரண்டு மாபெரும் வர்த்தகக் கப்பல்களின் கம்ப்யூட்டர் நெட்வொர்க்குகளுக்குள் மர்ம நபர்கள் ஊடுருவியதை அடுத்து, அமெரிக்காவின் FBI மற்றும் கடலோரக் காவல்படையினர் அதிரடியாக அந்தக் கப்பல்களுக்குள் நுழைந்து சோதனையில் ஈடுபட்டுள்ளனர்.
கடந்த ஆகஸ்ட் மாதம் மெக்சிகோ வளைகுடாப் பகுதியில் இந்த இருவேறு சம்பவங்களும் அடுத்தடுத்து அரங்கேறியுள்ளன. இதில் ‘விஎல் ப்ராஸ்பெரிட்டி’ (VL Prosperity) என்ற பெயர் கொண்ட ஒரு கப்பல் ஹேக்கர்களால் மிகக் கடுமையாகப் பாதிக்கப்பட்டுள்ளது. இந்த ஹேக்கர்கள் கப்பலின் தகவல்களைத் திருடியதோடு மட்டுமில்லாமல், கப்பலின் இன்ஜின் அறைக்குள் நேரடியாக ஊடுருவி, அதன் வேகத்தைத் தன்னிச்சையாக அதிகரித்துள்ளனர்.
அதுமட்டுமின்றி, இன்ஜினைக் குளிரவைக்கும் அமைப்பையும், எரிபொருள் கட்டுப்பாட்டையும் துண்டித்து, சுமார் முப்பது மணி நேரம் அந்தக் கப்பலின் ஒட்டுமொத்த தகவல் தொடர்பையும் முற்றிலுமாக முடக்கியுள்ளனர்.
எந்தவொரு வெளிநாட்டுத் தொடர்பும் இன்றி நடுக்கடலில் ஒரு கப்பல் ஹேக்கர்களின் கட்டுப்பாட்டிற்குள் சென்றது, சர்வதேச கப்பல் போக்குவரத்துத் துறையில் பெரும் பீதியை ஏற்படுத்தியுள்ளது.
அமெரிக்கா மற்றும் ஈரானுக்கு இடையே பனிப்போர் நிலவி வரும் தற்போதைய சூழ்நிலையில், இந்தத் தாக்குதல்களுக்குப் பின்னால் வெளிநாட்டு சைபர் குற்றவாளிகள் இருப்பதாக அமெரிக்கக் கடலோரக் காவல்படை தெரிவித்துள்ளது.
இணையவழித் தாக்குதல் என்பது இதுவரை கம்ப்யூட்டர் மற்றும் செல்போன்களுக்கு மட்டுமே ஆபத்தாக இருந்த நிலையில், தற்போது நேரடியாகக் கப்பல்களின் இன்ஜினையே இயக்கும் அளவுக்குத் தொழில்நுட்பம் விபரீதமாகியுள்ளது.
இதுபோன்ற சைபர் தாக்குதல்கள் எதிர்காலத்தில் இன்னும் மிகப்பெரிய அளவில் அதிகரிக்க வாய்ப்புள்ளதாக கடல்சார் பாதுகாப்பு நிபுணர்கள் உலக நாடுகளுக்கு மிகக் கடுமையான எச்சரிக்கையை விடுத்துள்ளனர்.
