அமெரிக்காவின் அவசர கால பெட்ரோல் சேமிப்பு இப்போது ஒரு இக்கட்டான நிலையை எட்டியுள்ளது. இதனைச் சரி செய்ய அதிபர் டொனால்ட் ட்ரம்ப் ஒரு மிகப்பெரிய ராஜதந்திர நகர்வை முன்னெடுத்துள்ளார்.
அமெரிக்காவின் ‘தேசிய மூலோபாய பெட்ரோலிய சேமிப்பு’ (Strategic Petroleum Reserve) தற்போது அதன் மொத்த கொள்ளளவில் வெறும் 40 சதவீதமாகக் குறைந்துவிட்ட சூழலில், அந்த வெற்றிடத்தை வெனிசுலா நாட்டு கச்சா எண்ணெய் மூலம் நிரப்பப்போவதாக ட்ரம்ப் அதிரடியாக அறிவித்துள்ளார்.
தனது ட்ரூத் சோஷியல் (Truth Social) பக்கத்தில் இதனைப் பதிவிட்டுள்ள அவர், இந்த எண்ணெய் வெனிசுலா மக்கள் அமெரிக்காவிற்கு அளித்த ஒரு ‘பரிசு’ என்றும் வர்ணித்துள்ளார்.
அமெரிக்காவின் இந்த பெட்ரோல் சேமிப்பு கிடங்கு மொத்தம் 700 மில்லியன் பேரல் கொள்ளளவு கொண்டது. ஆனால், தற்போது அதில் வெறும் 289.7 மில்லியன் பேரல் மட்டுமே இருப்பு உள்ளது.
இந்த நிலைமைக்கு முன்னாள் அதிபர் ஜோ பைடன் தான் காரணம் என்று குற்றம் சாட்டியுள்ள ட்ரம்ப், அவர் தனது பதவிக்காலத்தில் இந்தச் சேமிப்பைத் தேவையற்று வீணடித்துவிட்டதாகச் சாடியுள்ளார்.
உண்மையில், ட்ரம்ப் மற்றும் பைடன் ஆகிய இருவருமே தங்களின் காலக்கட்டங்களில் இந்தச் சேமிப்பிலிருந்து அதிகப்படியான எண்ணெய்யை எடுத்துப் பயன்படுத்தியுள்ளனர் என்பது குறிப்பிடத்தக்கது.
இந்தத் திட்டத்திற்காக, வெனிசுலாவில் உள்ள சுமார் 65 பில்லியன் பேரல் கச்சா எண்ணெய் வளத்தை அமெரிக்கா தனது முழு கட்டுப்பாட்டிற்குள் கொண்டு வரப்போகிறது.
இதற்காகப் பல தனியார் நிறுவனங்களுடன் இணைந்து ஒரு புதிய மெகா எண்ணெய் நிறுவனத்தை அமெரிக்கா உருவாக்கி வருகிறது. கையிருப்பைப் பொறுத்தவரை, இது உலகிலேயே சவுதி அரம்கோவிற்கு அடுத்தபடியாக இரண்டாவது பெரிய தனியார் நிறுவனமாக உருவெடுக்கும்.
இதன் மூலம் அடுத்த சில தசாப்தங்களுக்கு அமெரிக்காவின் பெட்ரோல் தேவையை எவ்விதத் தடையுமின்றிப் பூர்த்தி செய்ய முடியும் என்பதே ட்ரம்ப்பின் இலக்கு.
ஈரான் மற்றும் இஸ்ரேல் இடையேயான போரால் உலக அளவில் கச்சா எண்ணெய் விலை உயர்ந்து வரும் வேளையில், வெனிசுலாவுடன் ட்ரம்ப் செய்துள்ள இந்த மெகா ஒப்பந்தம் அமெரிக்கப் பொருளாதாரத்திற்கு ஒரு மிகப்பெரிய ஊக்கத்தை அளிக்கும் என எதிர்பார்க்கப்படுகிறது.
“டாப்பிங் அவுட்” (Topping out) என்று ட்ரம்ப் அழைக்கும் இந்தச் சேமிப்பை நிரப்பும் பணி விரைவில் தொடங்கவுள்ளது. ஒரு நாட்டின் அவசர கால எரிபொருள் தேவையை உறுதி செய்ய ட்ரம்ப் எடுத்துள்ள இந்த மாஸ்டர் பிளான், சர்வதேச எண்ணெய் சந்தையில் ஒரு மிகப்பெரிய தாக்கத்தை ஏற்படுத்தும் என்பதில் சந்தேகமே இல்லை.
