தமிழக அரசு மருத்துவமனைகளின் தரத்தை உயர்த்தவும், அங்கு சிகிச்சைக்காக வரும் சாமானிய மக்களுக்குச் சிறந்த மருத்துவச் சேவை கிடைப்பதை உறுதி செய்யவும் முதலமைச்சர் விஜய் அவர்கள் தற்போது அதிரடியான ஒரு புதிய நடவடிக்கையைக் கையில் எடுத்துள்ளார்.
அரசு மருத்துவமனைகளில் நிலவும் உள்கட்டமைப்பு குறைபாடுகள் மற்றும் தூய்மைப் பணிகள் தொடர்பான புகார்களுக்கு உடனடியாகத் தீர்வு காணும் வகையில், ஐம்பது சிறப்பு அதிகாரிகள் நியமிக்கப்பட்டுப் போர்க்கால அடிப்படையில் பணிகள் தொடங்கப்பட்டுள்ளன.
சமீபகாலமாக அரசு மருத்துவமனைகள் மற்றும் அரசு மருத்துவக் கல்லூரிகளில் நிலவும் சுகாதாரம், சுத்தமான குடிநீர் வசதி, கழிவறைகள், உள்கட்டமைப்பு மற்றும் மருத்துவர்கள், செவிலியர்கள் பற்றாக்குறை குறித்து முதலமைச்சர் அலுவலகத்திற்குத் தொடர்ந்து புகார்கள் வந்த வண்ணம் இருந்தன.
இப்படி ஒட்டுமொத்தமாக முன்னூற்று நான்கு குறைபாடுகள் அரசுத் தரப்பில் அதிகாரப்பூர்வமாகப் பட்டியலிடப்பட்டுள்ளன. சென்னை, கோவை, திருச்சி, மதுரை, சேலம், நெல்லை எனத் தமிழகத்தின் முப்பத்தியோரு முக்கிய மாவட்டங்களில் உள்ள அரசு மருத்துவமனைகளில் இருந்துதான் இந்த புகார்கள் அதிகளவில் பதிவாகியிருக்கின்றன.
மக்களின் இந்த நியாயமான புகார்களை உடனடியாகச் சரிசெய்ய உத்தரவிட்ட முதலமைச்சர் விஜய், இதற்காக ஐம்பது ஒருங்கிணைப்பு அதிகாரிகளை, அதாவது நோடல் அதிகாரிகளை அதிரடியாகக் களமிறக்கியுள்ளார்.
இந்த ஒட்டுமொத்த திட்டத்தின் முதன்மை நோடல் அதிகாரியாக வேலூர் அரசு மருத்துவக் கல்லூரி பேராசிரியை டாக்டர் சுதர்ஷினி நியமிக்கப்பட்டுள்ளார். இவர்களோடு இணைந்து சென்னை கீழ்ப்பாக்கம் மருத்துவக் கல்லூரி டாக்டர் இந்துமதி மற்றும் கண்காணிப்பாளர் சிவபிரகாஷ் ஆகியோர் இந்தச் சீரமைப்புப் பணிகளைத் தீவிரமாக ஒருங்கிணைக்க உள்ளனர்.
இந்த அதிகாரிகள் நேரடியாக ஒவ்வொரு அரசு மருத்துவமனைக்கும் சென்று ஆய்வு செய்வதோடு மட்டுமல்லாமல், மாவட்ட ஆட்சியர்களுடன் இணைந்து பணிகளைத் துரிதப்படுத்த வேண்டும் என்று உத்தரவிடப்பட்டுள்ளது. முக்கியமாக, மருத்துவமனைகளில் செய்யப்பட வேண்டிய சீரமைப்புப் பணிகளுக்கு முன்னும், அந்தப் பணிகள் முடிந்த பின்னும் எடுக்கப்பட்ட புகைப்படங்களுடன் கூடிய விரிவான அறிக்கையைத் தலைமைச் செயலகத்திற்குச் சமர்ப்பிக்க வேண்டும்.
பதினைந்து நாட்களுக்கு ஒருமுறை இந்த அறிக்கைகள் ஆய்வு செய்யப்பட்டு, குறைகள் அனைத்தும் விரைவாகக் களையப்படும் என்று மருத்துவக் கல்வி மற்றும் ஆராய்ச்சி இயக்ககம் தெரிவித்துள்ளது. ஏழை எளிய மக்கள் நம்பி வரும் அரசு மருத்துவமனைகளைச் சீரமைக்கத் தவெக அரசு எடுத்துள்ள இந்த அதிரடி நடவடிக்கை மக்கள் மத்தியில் தற்போது மிகப்பெரிய பாராட்டைப் பெற்றுள்ளது.
