இசை உலகை ஆளும் ராக்ஸ்டார் அனிருத் மற்றும் சன் குழுமத்தின் வாரிசும், சன்ரைசர்ஸ் ஹைதராபாத் அணியின் சிஇஓ-வுமான காவ்யா மாறன்.. இவர்களின் திருமணம் பற்றிய செய்திகள் நீண்ட நாட்களாக இணையத்தில் வலம் வந்து கொண்டிருந்தன. ஆனால், இப்போது முதல் முறையாக அனிருத்தின் நெருங்கிய குடும்ப உறுப்பினர் ஒருவரே இதனை உறுதி செய்திருப்பது ஒட்டுமொத்தத் திரையுலகையும், கிரிக்கெட் உலகையும் ஒருசேர அதிர வைத்துள்ளது.
அனிருத்தின் மாமாவும், மூத்த நடிகருமான ஒய்.ஜி.மகேந்திரன் அண்மையில் அளித்த பேட்டி ஒன்றில், அனிருத் மற்றும் காவ்யா மாறன் திருமணம் என்பது ஏறக்குறைய உறுதி செய்யப்பட்ட ஒன்று என்ற ரீதியில் பேசியுள்ளது பெரும் விவாதத்தை ஏற்படுத்தியுள்ளது.
அனிருத் பற்றிப் பேசிய ஒய்.ஜி.மகேந்திரன், அவர் மிகவும் மென்மையான குணம் கொண்டவர் என்றும், இப்போது ஒரு மிகப்பெரிய குடும்பத்தில் அவர் சம்பந்தம் செய்யப் போவதாகவும் தெரிவித்துள்ளார். “எனக்குச் சொல்லப்பட்ட தகவலின்படி, இது நடப்பது உறுதி; அவர்கள் இருவரும் திருமணம் செய்து கொள்ளப் போகிறார்கள்” என்று அவர் கூறி, தனது மருமகனுக்கு இப்போதே வாழ்த்துகளையும் தெரிவித்துள்ளார்.
இந்தத் தகவல் வெளியான சில நிமிடங்களிலேயே சமூக வலைதளங்களில் அனிருத் – காவ்யா திருமணம் குறித்த செய்திகள் காட்டுத்தீயாகப் பரவத் தொடங்கிவிட்டன. திருமணத் தேதி அல்லது இடம் குறித்து அவர் வெளிப்படையாகக் கூறவில்லை என்றாலும், இது ஒரு ‘Sure Thing’ என்று அவர் குறிப்பிட்டது ரசிகர்களிடையே ஒரு பெரிய எதிர்பார்ப்பை உருவாக்கியுள்ளது.
காவ்யா மாறன் பற்றிப் புகழாரம் சூட்டிய ஒய்.ஜி.மகேந்திரன், அவர் ஒன்றும் சாதாரணப் பெண் அல்ல என்றும், தனது தந்தை கலாநிதி மாறனிடம் இருந்து தொழிலைக் கையாளும் திறமையை அப்படியே பெற்றுள்ளவர் என்றும் கூறியுள்ளார். ஒரு ஐபிஎல் அணியையே மிகச் சிறப்பாக வழிநடத்தும் திறன் கொண்ட காவ்யா, அனிருத்திற்கு மிகவும் பொருத்தமான ஜோடி என்றும், இவர்கள் இருவரும் இணைந்து இசை சார்ந்த தொழில்களில் கூட ஒரு மிகப்பெரிய மாற்றத்தை உருவாக்க வாய்ப்புள்ளதாகவும் அவர் சுட்டிக்காட்டியுள்ளார்.
இதுவரை வெறும் வதந்திகளாக மட்டுமே பார்க்கப்பட்ட இந்த விவகாரத்தில், ஒரு குடும்ப உறுப்பினர் மூலமாகவே இப்படி ஒரு கருத்து வந்திருப்பது பலரையும் ஆச்சரியத்தில் ஆழ்த்தியுள்ளது. ஏற்கனவே 2025-ஆம் ஆண்டு இவர்களின் காதல் மற்றும் திருமணம் குறித்து இணையத்தில் ஒரு பதிவு வைரலானது. அப்போது அனிருத் இதனைச் சிரித்துக்கொண்டே மறுத்ததோடு, வதந்திகளைப் பரப்ப வேண்டாம் என்றும் கேட்டுக் கொண்டிருந்தார்.
சூப்பர் ஸ்டார் ரஜினிகாந்த் அவர்களே நேரில் சென்று கலாநிதி மாறனிடம் இது குறித்துப் பேசியதாகக் கூட செய்திகள் உலா வந்தன. ஆனால், இப்போது வரை அனிருத் அல்லது காவ்யா மாறன் தரப்பிலிருந்து எந்தவித அதிகாரப்பூர்வ அறிவிப்பும் வரவில்லை. ராக்ஸ்டார் அனிருத் தற்போது பல மெகா ஹிட் படங்களின் பணிகளில் பிசியாக இருக்கும் வேளையில், இந்தத் திருமணச் செய்தி அவரது ரசிகர்களுக்கு ஒரு மிகப்பெரிய இன்ப அதிர்ச்சியாக அமைந்துள்ளது. விரைவில் இந்த நட்சத்திர ஜோடியிடம் இருந்து வரும் அதிகாரப்பூர்வ அறிவிப்பிற்காகத் திரையுலகமே காத்திருக்கிறது.
