தமிழக வெற்றிக் கழகத் தலைவர் விஜய் இன்று சென்னையில் நடைபெற்ற பொதுக்கூட்டத்தில் தனது இறுதிக்கட்ட தேர்தல் பிரசாரத்தை மேற்கொண்டார். இந்த கூட்டத்தில் அவர் மத்திய அரசின் ஒரு அமைச்சரால் முன்வைக்கப்பட்ட விமர்சனத்திற்கு கடுமையான பதிலடி அளித்தார்.
அந்த அமைச்சர் விஜயை “நடிகர்” என்று குறிப்பிட்டு அரசியலுக்கு தகுதியற்றவர் என விமர்சித்திருந்தார். இதற்கு பதிலளித்த விஜய், “ஆம், நான் நடிகர்தான். அதை யாரும் புதிதாக கண்டுபிடித்தது இல்லை. ஆனால் நான் அரசியலுக்கு வந்தது நடிப்பதற்காக அல்ல, அரசியலில் நடிக்கவும் இல்லை” என்று தெரிவித்தார். அவரது இந்த பேச்சு கூட்டத்தில் பெரும் உற்சாகத்தை ஏற்படுத்தியது.
மேலும் பேசிய அவர், “நீங்கள் என்ன செய்கிறீர்கள்? அரசியலில் இருந்துகொண்டு நாடகம் மேல் நாடகம் போடுகிறீர்கள். மத்திய அரசின் அதிகாரத்தை கையில் வைத்துக்கொண்டு திமுகவுடன் ஒரு நாடகம், மற்றவர்களுடன் ஒரு நாடகம் நடத்துகிறீர்கள். அப்படியானால் உங்களை நாடக நடிகர்கள் என்று சொல்லலாமா?” என கேள்வி எழுப்பினார்.
அவர் தொடர்ந்து, அரசியல் என்பது மக்களின் நலனுக்காக இருக்க வேண்டும் என்றும், தனிப்பட்ட அரசியல் நாடகங்களுக்காக அல்ல என்றும் வலியுறுத்தினார். அதிகாரத்தை தவறாக பயன்படுத்துவது மற்றும் கூட்டணி அரசியலில் இரட்டை நிலைப்பாடு காட்டுவது மக்களை ஏமாற்றும் செயல் எனவும் அவர் குற்றம்சாட்டினார்.
இந்த பேச்சு பொதுக்கூட்டத்தில் கலந்து கொண்ட ரசிகர்கள் மற்றும் ஆதரவாளர்கள் மத்தியில் பெரும் வரவேற்பை பெற்றது. விஜயின் இந்த இறுதி கட்ட பிரசாரம் தேர்தல் சூழலில் கூடுதல் கவனத்தை பெற்றுள்ளது.
