நிலம் அல்லது வீடு வாங்கிய பிறகு, அந்த சொத்தின் உரிமையை அரசு ஆவணங்களில் உறுதி செய்யும் முக்கிய ஆவணம் தான் பட்டா. பட்டாவில் பெயரைச் சேர்ப்பது சட்டப்படி சில குறிப்பிட்ட காரணங்களுக்கே அனுமதிக்கப்படுகிறது.
முதலில், வாங்கும் – விற்பனை ஒப்பந்தம் அதாவது Sale Deed மூலம் ஒருவர் நிலத்தை வாங்கியிருந்தால், அவர் பெயர் பட்டாவில் சேர்க்கப்படும். இதற்கான ஆவணமாக பதிவு செய்யப்பட்ட கிரயப்பத்திரம் அவசியமாக தேவைப்படும்.
அடுத்ததாக, Legal Heirship என்று சொல்லப்படும் வருங்கால உரிமை அடிப்படையில், ஒருவர் மறைந்துவிட்டால், அவரது சட்டபூர்வ வாரிசுகளின் பெயர்கள் பட்டாவில் சேர்க்கப்படும். இதற்கு சட்டபூர்வ வாரிசுச் சான்று அதாவது Legal Heir Certificate சமர்ப்பிக்க வேண்டும்.
அடுத்து Settlement Deed, Gift Deed என்று கூறப்படும் பரிசளிப்பு போன்ற ஆவணங்கள் அடிப்படையிலும் பெயர் சேர்க்கப்படும். குடும்பத்தினரிடையே சொத்து பரிமாறும்போது இந்த ஆவணங்கள் பயன்படுத்தப்படுகின்றன.
மேலும், நீதிமன்றத் தீர்ப்பு இருந்தால், அதன்படி பெயரை மாற்றவோ, சேர்க்கவோ அரசு அனுமதிக்கும். சில நேரங்களில் Joint Owners பெயர்களும் ஒரே நேரத்தில் பட்டாவில் பதிவு செய்யப்படும். இதற்கான விண்ணப்பத்தை அருகிலுள்ள தாலுகா அலுவலகம் அல்லது வருவாய் துறை மூலம் அளிக்க வேண்டும். அடையாள ஆவணங்கள், சொத்து ஆவணங்கள் மற்றும் தேவையான சான்றுகள் இணைக்கப்பட்டிருக்க வேண்டும்.
இதனால், பட்டாவில் பெயர் சேர்ப்பது சுலபமான நடைமுறையாக இருந்தாலும், சட்டப்படி உறுதியான காரணங்களும் சரியான ஆவணங்களும் இருக்க வேண்டியது மிக முக்கியம் என்று நிபுணர்கள் தெரிவிக்கின்றனர்.