துணை குடியரசுத் தலைவராகும் நான்காவது தமிழர்! யார் இந்த சி.பி. ராதாகிருஷ்ணன்?

இந்தியாவின் அடுத்த துணை குடியரசுத் தலைவர் யார் என்ற கேள்வி, இப்போது தீவிரமடைந்த நிலையில், ஆளும் தேசிய ஜனநாயகக் கூட்டணி,இப்போது தங்களது வேட்பாளராக, தமிழ்நாட்டைச் சேர்ந்த சி.பி. ராதாகிருஷ்ணனை அதிகாரப்பூர்வமாக அறிவித்துள்ளது.

ஜெகதீப் தன்கர் தனது பதவியை ராஜினாமா செய்ததைத் தொடர்ந்து, செப்டம்பர் 9-ஆம் தேதி நடைபெறவிருக்கும் இந்தத் தேர்தலில், சி.பி. ராதாகிருஷ்ணனின் பின்னணி என்ன? அவரது அரசியல் பயணம் எப்படிப்பட்டது? வாங்க, விரிவாகப் பார்க்கலாம்.

1957-ஆம் ஆண்டு, திருப்பூரில் பிறந்தவர் சந்திராபுரம் பொன்னுசாமி ராதாகிருஷ்ணன். தனது மாணவர் பருவத்திலேயே, ஆர்.எஸ்.எஸ். மற்றும் ஜன சங்கம் அமைப்புகளில் தன்னை இணைத்துக் கொண்டார்.

அவரது அரசியல் பயணத்தில் ஒரு முக்கியத் திருப்புமுனையாக அமைந்தது, 1998-ஆம் ஆண்டு நடந்த நாடாளுமன்றத் தேர்தல். அப்போது, கோயம்புத்தூர் தொகுதியில் போட்டியிட்ட அவர், ஒன்றரை லட்சம் வாக்குகள் வித்தியாசத்தில் வெற்றி பெற்று, முதன்முறையாக நாடாளுமன்றத்திற்குள் நுழைந்தார். அதனைத் தொடர்ந்து, 1999-ஆம் ஆண்டு நடந்த தேர்தலிலும், மீண்டும் அதே தொகுதியில் வெற்றி பெற்றார்.

நாடாளுமன்ற உறுப்பினராக இருந்த காலத்தில், முன்னாள் பிரதமர் அடல் பிகாரி வாஜ்பாயுடன் நெருக்கமாகப் பணியாற்றிய இவர், ஜவுளித்துறைக்கான நாடாளுமன்ற நிலைக்குழுத் தலைவர், பங்குச் சந்தை ஊழலை விசாரிக்கும் சிறப்புக் குழு உறுப்பினர் எனப் பல முக்கியப் பொறுப்புகளை வகித்துள்ளார். மேலும், ஐக்கிய நாடுகள் சபையின் பொதுச் சபையிலும் இந்தியா சார்பில் உரையாற்றியிருக்கிறார்.

2004-ஆம் ஆண்டு, பாஜகவின் தமிழ்நாடு மாநிலத் தலைவராகப் பொறுப்பேற்றார். அப்போது, தமிழ்நாடு முழுவதும் 93 நாட்கள், 19,000 கிலோமீட்டர் தூரத்திற்கு ஒரு ரத யாத்திரையையும் அவர் நடத்தினார்.

தேர்தல் அரசியலில் சில தோல்விகளைச் சந்தித்தாலும், மத்திய அரசுப் பதவிகளில் தொடர்ந்து நீடித்தார். தென்னை நார் வாரியத் தலைவர், கேரள மாநில பாஜக பொறுப்பாளர் போன்ற பதவிகளை வகித்தார்.

சமீபத்தில், அவரது அரசியல் பயணம் ஒரு புதிய உச்சத்தை எட்டியது. 2023-ல் ஜார்கண்ட் ஆளுநராகவும், பின்னர் தெலுங்கானா, புதுச்சேரி, இறுதியாக மகாராஷ்டிரா மாநிலத்தின் ஆளுநராகவும் அடுத்தடுத்து நியமிக்கப்பட்டார்.

எந்த மாநிலத்தில் ஆளுநராக இருந்தாலும், தமிழக அரசியல் நிகழ்வுகளைத் தொடர்ந்து கவனித்து, தனது கருத்துக்களைப் பதிவு செய்து வந்தவர். இப்போது, தனது 50 ஆண்டுகால அரசியல் பயணத்தின் ஒரு மைல் கல்லாக, இந்தியாவின் துணை குடியரசுத் தலைவர் வேட்பாளராக அறிவிக்கப்பட்டுள்ளார்.

ஆளும் கூட்டணிக்குத் தேவையான பெரும்பான்மை இருப்பதால், சி.பி. ராதாகிருஷ்ணன், இந்தியாவின் அடுத்த துணை குடியரசுத் தலைவராகத் தேர்ந்தெடுக்கப்படுவதற்கான வாய்ப்புகள் பிரகாசமாகவே உள்ளன. இதன் மூலம், சர்வபள்ளி ராதாகிருஷ்ணன், ஆர். வெங்கட்ராமன், கே.ஆர். நாராயணன் ஆகியோருக்குப் பிறகு, இந்தப் பதவியை அலங்கரிக்கப் போகும் நான்காவது தமிழராக அவர் உருவெடுக்க போகிறார்.