இந்தியாவின் இராணுவ விமானப்படையைச் சேர்ந்த குரூப் கேப்டன் சுபன்ஷு சுக்லா. இவர் உத்தரப் பிரதேச மாநிலத்தில் பிறந்தவர். சிறுவயதிலிருந்தே விண்வெளியைப் பற்றிய ஆழ்ந்த ஆர்வம் கொண்டவர். பைலட் பயிற்சி, உயர் ராணுவப் பணிகள், மற்றும் விஞ்ஞான அறிவில் இவர் காட்டிய அர்ப்பணிப்பு காரணமாகவே, இஸ்ரோவினால் இவர் இந்த மிஷனுக்குத் தேர்வு செய்யப்பட்டார்.
இவர்,விண்வெளிக்குச் செல்லும் இரண்டாவது இந்திய விண்வெளி வீரர் என்பது குறிப்பிடத்தக்கது. முதல் வீரர் விங் கமாண்டர் ராகேஷ் சர்மா, 1984-ல் சோவியத் யூனியனுடன் இணைந்து விண்வெளிக்குச் சென்றார். சுமார் நாற்பது ஆண்டுகள் கழித்து, இப்போது குரூப் கேப்டன் சுக்லா, இந்தியாவின் அந்த வராலற்றில் மீண்டும் இடம் பெற்றிருக்கிறார்.
இவர் பங்களிக்கும் இந்த “ஆக்சியம்-4” மிஷன் மூலம், இந்தியாவின் தலைமை, திறமை, மற்றும் தொழில்நுட்ப பங்களிப்பு சர்வதேச நிலைக்கே எட்டும் என்பதை உலகம் அறிய இருக்கிறது.
பல தடைகளையும் தாண்டி தான் இந்த மிஷன் இன்று வெற்றிகரமாக நடக்க இருக்கிறது. கடந்த மே 29ஆம் தேதி அறிவிக்கப்பட்ட இந்த ஆக்சியம்-4 திட்டம், வானிலை பிரச்னை, தொழில்நுட்ப கோளாறுகள், ஆக்சிடைசர் கசிவு என தொடர்ச்சியான தாமதங்களை சந்தித்தது. நாசா ஆறாவது முறையாக இன்று மிதமான உற்சாகத்தோடு இந்த ராக்கெட் புறப்படும் என்று அறிவித்துள்ளது. இது இந்தியா-அமெரிக்கா இடையேயான புதிய விண்வெளிப் பங்குதாரத் தொடர் என்றும், ‘மிஷன் ஆகாஷ் கங்கா’ என்றும் அழைக்கப்படுகிறது.
இந்த குழு சர்வதேச விண்வெளி நிலையத்தில் சுமார் 14 நாட்கள் தங்க இருக்கின்றனர். அவர்கள் அங்கு மொத்தம் 60 அறிவியல் ஆய்வுகளை மேற்கொள்ளவிருக்கிறார்கள். அதில் ஏழு சோதனைகள் இந்தியாவில் உள்ள ஆராய்ச்சியாளர்களால் முன்மொழியப்பட்டது என்பது பெருமைக்குரியது. இந்த பயணத்தின் போது, சுக்லா சில நிகழ்ச்சிகளில் பங்கேற்று, விண்வெளியில் இருந்தபடியே ஒரு முக்கியமான நபருடன் நேரலையில் உரையாடவுள்ளார். இது எந்த ஒரு திரைப்பட கற்பனை அல்ல – உண்மை.
இந்த பயணத்திற்கு முன்னதாக சுக்லா மற்றும் குழுவினர் சுமார் ஒரு மாதமாக தனிமைப்படுத்தப்பட்டு, அவர்களின் உடல்நிலை ஒழுங்காக இருக்கின்றதா என ஆய்வு செய்யப்பட்டு, எல்லா சோதனைகளையும் கடந்து இன்று அந்த ராக்கெட்டில் ஏறுகின்றனர். இது விஞ்ஞான சாதனைகளுக்கும், இரு தேசங்களுக்கும் இடையேயான நம்பிக்கைக்கும் ஓர் எடுத்துக்காட்டாக இருக்கிறது.
இந்த பயணம், இந்திய இஸ்ரோ மற்றும் அமெரிக்க நாசா இடையே 2023ல் பிரதமர் நரேந்திர மோடி அமெரிக்கா சென்றபோது உருவான முக்கிய ஒப்பந்தத்தின் விளைவு. இந்த பயணம் வெறும் விண்வெளி சுற்றுலா அல்ல. இது அறிவியல், அரசியல், நம்பிக்கை, கனவு, மற்றும் நாட்டுப்பற்று ஆகிய அனைத்தும் ஒன்றாகும் ஒரு பயணம்.