ஒரே ஒரு நாளில் சுமார் ஒரு டிரில்லியன் அமெரிக்க டாலர், அதாவது இந்திய மதிப்பில் கிட்டத்தட்ட எண்பத்தைந்து லட்சம் கோடி ரூபாய் பணம் பங்குச்சந்தையில் காற்றில் கரைந்து போனது என்றால் உங்களால் நம்ப முடிகிறதா? உலகப் பொருளாதாரத்தையே தங்கள் விரல் நுனியில் வைத்திருக்கும் உலகின் டாப் ஏழு தொழில்நுட்ப ஜாம்பவான்களுக்கு வியாழக்கிழமையன்று இப்படியொரு வரலாறு காணாத பேரிடி விழுந்துள்ளது.
செயற்கை நுண்ணறிவு எனப்படும் ஏஐ மற்றும் தொழில்நுட்பப் பங்குகளை முதலீட்டாளர்கள் போட்டி போட்டுக்கொண்டு விற்றுத் தள்ளியதால், அமெரிக்கப் பங்குச்சந்தையான வால் ஸ்ட்ரீட் ஆட்டம் கண்டு போயிருக்கிறது.
‘மேக்னிஃபிசென்ட் செவன்’ (Magnificent Seven)என்று அழைக்கப்படும் இந்த ஏழு பிரம்மாண்ட நிறுவனங்களில், ஏஐ சிப் தயாரிப்பில் உலகையே ஆட்சி செய்து வரும் என்விடியா (Nvidia) நிறுவனம் மட்டும் ஒரே நாளில் சுமார் நானூற்று முப்பத்தொரு பில்லியன் டாலர் சந்தை மதிப்பை இழந்து மிகப்பெரிய அடியை வாங்கியுள்ளது.
அதற்கு அடுத்தபடியாக எலான் மஸ்க்கின் டெஸ்லா நிறுவனப் பங்குகள் சுமார் பன்னிரண்டு சதவீதம் வரை சரிந்து நூற்று எண்பத்தொரு பில்லியன் டாலரையும், மைக்ரோசாப்ட் நிறுவனம் நூற்று இருபத்து மூன்று பில்லியன் டாலரையும் பறிகொடுத்துள்ளன.
இதேபோல் ஆப்பிள் நிறுவனம் எண்பத்தைந்து பில்லியன், கூகுளின் தாய் நிறுவனமான ஆல்ஃபபெட் அறுபத்தைந்து பில்லியன், அமேசான் அறுபத்தொரு பில்லியன் மற்றும் மெட்டா நிறுவனம் அறுபது பில்லியன் டாலர் எனத் தங்களின் பல லட்சம் கோடி மதிப்பிலான சொத்துக்களை ஒரே நாளில் இழந்து தவிக்கின்றன.
இந்தக் கோர தாண்டவம் இந்த ஏழு நிறுவனங்களோடு மட்டும் நின்றுவிடவில்லை; செமிகண்டக்டர் சிப் தயாரிப்பு நிறுவனங்களான ஏ.எம்.டி மற்றும் மைக்ரான் ஆகியவற்றின் பங்குகள் பதினேழு சதவீதம் வரை பாதாளத்தில் சரிந்தன.
இதன் நேரடி எதிரொலியாக அமெரிக்காவின் நாஸ்டாக், எஸ் அண்ட் பி 500 மற்றும் டவ் ஜோன்ஸ் ஆகிய மூன்று முக்கியப் பங்குச்சந்தை குறியீடுகளும் கடந்த 2025-ஆம் ஆண்டு ஏப்ரல் மாதத்திற்குப் பிறகு இல்லாத அளவிற்கு மிக மோசமான ஒருநாள் வீழ்ச்சியைப் பதிவு செய்துள்ளன.
இதன் அதிர்வலைகள் ஆசியச் சந்தைகளுக்கும் பரவி ஜப்பான் மற்றும் தென் கொரியப் பங்குச்சந்தைகளையும் நிலைகுலைய வைத்துள்ளன.
திடீரென ஏஐ மற்றும் டெக் பங்குகள் இப்படிச் சீட்டுக்கட்டு போலச் சரிந்ததற்குப் பின்னால் அமெரிக்க இடைத்தேர்தல் முடிவுகளே மிக முக்கியக் காரணமாகப் பார்க்கப்படுகின்றன.
அமெரிக்க நாடாளுமன்றத்தை எதிர்க்கட்சியான ஜனநாயகக் கட்சி கைப்பற்றியுள்ளதால், ஏஐ டேட்டா சென்டர்களின் அசுர வளர்ச்சிக்கு இனி கடுமையான கட்டுப்பாடுகள் விதிக்கப்படலாம் என்ற அச்சம் முதலீட்டாளர்களிடையே எழுந்துள்ளது. குறிப்பாக, இந்த பிரம்மாண்ட டேட்டா சென்டர்களை இயக்கத் தேவைப்படும் அதிகப்படியான மின்சாரம் மற்றும் தண்ணீர் பயன்பாட்டிற்குப் புதிய வரிகளும் கெடுபிடிகளும் வரலாம் எனக் கூறப்படுகிறது.
பல பில்லியன் டாலர்களைத் தண்ணீராக ஏஐ தொழில்நுட்பத்தில் கொட்டும் நிறுவனங்களால் அதற்கு ஈடான லாபத்தை மீண்டும் எடுக்க முடியுமா என்ற மாபெரும் கேள்வி எழுந்துள்ளதே இந்த வரலாற்றுச் சரிவுக்கு முக்கியக் காரணமாக அமைந்துள்ளது.
