அமெரிக்க அதிபர் டொனால்ட் டிரம்ப்புக்கும், ஜனநாயகக் கட்சியினர் ஆளும் மாகாணங்களுக்கும் இடையேயான மோதல், இப்போது உச்சக்கட்டத்தை எட்டியுள்ளது. ஓரிகான் மாகாணத்தின் போர்ட்லேண்ட் நகருக்கு, தேசியக் காவல்படை வீரர்களை அனுப்பும் டிரம்ப் நிர்வாகத்தின் முடிவை எதிர்த்து, ஓரிகான் மற்றும் கலிபோர்னியா ஆகிய இரண்டு மாகாணங்களும் இணைந்து, டிரம்ப் மீது வழக்குத் தொடர்ந்துள்ளன.
சமீபத்தில், போர்ட்லேண்ட் நகரில் நடந்த குடியேற்ற எதிர்ப்புப் போராட்டங்களைக் கட்டுப்படுத்த, ஓரிகான் தேசியக் காவல்படையை அனுப்ப டிரம்ப் முயற்சித்தார். ஆனால், அதற்கு அந்நாட்டு நீதிமன்றம் தற்காலிகத் தடை விதித்தது. இந்தத் தடையைச் சமாளிக்க, டிரம்ப் ஒரு புதிய, அதிரடியான வழியைக் கையாண்டுள்ளார். லாஸ் ஏஞ்சல்ஸில் பணியில் இருந்த கலிபோர்னியா தேசியக் காவல்படை வீரர்களை, ஓரிகானுக்கு அனுப்பி வைத்துள்ளார்.
“இது, சட்டத்தையும், அதிகாரத்தையும் துஷ்பிரயோகம் செய்யும் ஒரு மூச்சடைக்க வைக்கும் செயல்,” என்று கலிபோர்னியா ஆளுநர் கவின் நியூசம் கடுமையாகக் கண்டித்துள்ளார். “அமெரிக்கக் குடிமக்களுக்கு எதிராகவே, அமெரிக்க ராணுவத்தை ஒரு அரசியல் ஆயுதமாக அதிபர் பயன்படுத்துகிறார்,” என்றும் அவர் கூறியுள்ளார்.
ஓரிகான் ஆளுநர் டினா கோடெக், “போர்ட்லேண்டில் எந்தக் கிளர்ச்சியும் இல்லை. தேசியப் பாதுகாப்பிற்கு எந்த அச்சுறுத்தலும் இல்லை. எங்கள் நகரத்திற்கு ராணுவத் தலையீடு தேவையே இல்லை,” என்று திட்டவட்டமாகத் தெரிவித்துள்ளார். “அமெரிக்க நகரங்களில் ராணுவத்தைப் பயன்படுத்துவதை இயல்பாக்கும் டிரம்ப்பின் முயற்சிக்கு, ஓரிகான் ஒருபோதும் துணை போகாது,” என்றும் அம்மாநில அரசு கூறியுள்ளது.
டிரம்ப், தனது அரசியல் எதிரிகள் ஆளும் நகரங்களைக் குறிவைத்து, இது போன்ற நடவடிக்கைகளை எடுப்பதாக ஜனநாயகக் கட்சியினர் குற்றம் சாட்டுகின்றனர். “இது கலிபோனியாவின் தேசியக் காவல்படை; டிரம்பின் தனிப்பட்ட ராயல் கார்டு அல்ல,” என்று கலிபோர்னியாவின் அட்டர்னி ஜெனரல் கூறியுள்ளார்.
ஒரு நாட்டின் அதிபரே, தனது சொந்த மாகாணங்களின் இறையாண்மையை மீறி, ராணுவத்தை அனுப்புவது, அமெரிக்காவின் கூட்டாட்சித் தத்துவத்திற்கே விடப்பட்ட ஒரு சவாலாகப் பார்க்கப்படுகிறது. இந்த சட்டப் போராட்டம், அமெரிக்காவின் எதிர்கால அரசியலில் ஒரு மிகப்பெரிய தாக்கத்தை ஏற்படுத்தும் என்பது மட்டும் உறுதி.