இந்தியா மற்றும் ரஷ்யா இடையேயான பல தசாப்த கால நட்பு இப்போது ஒரு புதிய வரலாற்று உச்சத்தை எட்டியுள்ளது. பிரதமர் நரேந்திர மோடி மற்றும் ரஷ்ய அதிபர் விளாடிமிர் புதின் இடையேயான தொடர் சந்திப்புகளின் பலனாக, ‘ரிலோஸ்’ (RELOS) எனப்படும் பரஸ்பர ராணுவ தளவாட ஒப்பந்தம் தற்போது அதிகாரப்பூர்வமாக நடைமுறைக்கு வந்துள்ளது. சர்வதேச அளவில் புதிய கூட்டணிகள் உருவாகி வரும் வேளையில், இந்தியாவும் ரஷ்யாவும் தங்களின் ராணுவ ரகசியங்களையும் வசதிகளையும் ஒருவருக்கொருவர் பகிர்ந்துகொள்ள முன்வந்திருப்பது உலக நாடுகளை வியப்பில் ஆழ்த்தியுள்ளது. இந்த ஒப்பந்தத்தின் மூலம் இரு நாடுகளும் தலா 3,000 ராணுவ வீரர்கள், 10 போர் விமானங்கள் மற்றும் 5 போர்க்கப்பல்களை ஒருவருக்கொருவர் எல்லைக்குள் எந்த நேரத்திலும் நிலைநிறுத்திக் கொள்ள முழு அனுமதி வழங்கப்பட்டுள்ளது.
இது வெறும் காகித அளவிலான ஒப்பந்தம் அல்ல; இரு நாடுகளின் ராணுவ முகாம்கள், கடற்படைத் தளங்கள் மற்றும் விமானப்படைத் தளங்களை ஒருவருக்கொருவர் பயன்படுத்திக்கொள்ள வழங்கப்பட்டுள்ள முழுமையான உரிமையாகும். இதன் மூலம் இந்தியாவின் வியூகங்கள் இப்போது ஆர்க்டிக் துருவம் வரை விரிவடைந்துள்ளது. ரஷ்யாவின் மர்மான்ஸ்க் (Murmansk)மற்றும் விலாடிவோஸ்டாக் போன்ற முக்கியத் தளங்களை இந்தியா பயன்படுத்துவதன் மூலம், பசிபிக் பெருங்கடல் மற்றும் ஆர்க்டிக் எரிசக்தி வளங்களில் இந்தியாவின் ஆதிக்கம் பல மடங்கு அதிகரிக்கும். பதிலுக்கு ரஷ்யா, இந்தியப் பெருங்கடல் பகுதியில் தனியாகப் பெரும் முதலீடு செய்து ராணுவத் தளங்களை அமைக்காமலேயே, இந்தியாவின் வசதிகளைப் பயன்படுத்தித் தனது கடற்படை பலத்தை இந்த முக்கியப் பிராந்தியத்தில் நிலைநிறுத்திக் கொள்ள முடியும்.
இந்த அதிரடி நகர்விற்குப் பின்னால் ஒரு மிகப்பெரிய ராஜதந்திரக் காரணம் ஒளிந்துள்ளது. அமெரிக்க அதிபர் டொனால்ட் ட்ரம்ப் தலைமையிலான அரசு, பாகிஸ்தான் ராணுவத் தளபதி ஆசிம் முனீருடன் அதிக நெருக்கம் காட்டி வருவதை இந்தியா உன்னிப்பாகக் கவனித்து வருகிறது. அமெரிக்காவின் இந்தப் பாகிஸ்தான் ஆதரவுப் போக்கிற்குப் பதிலடியாக, இந்தியா தனது பழைய நண்பனான ரஷ்யாவுடன் பாதுகாப்பை உறுதி செய்து கொள்கிறது. போர் மற்றும் அமைதி என இரண்டு காலங்களிலும் செயல்படக்கூடிய இந்த ஒப்பந்தம், எரிபொருள் நிரப்புவது முதல் பழுதுபார்ப்பு வரை அனைத்து ராணுவத் தேவைகளுக்கும் வழிவகை செய்கிறது.
வரும் செப்டம்பர் மாதம் புதின் பிரிக்ஸ் (BRICS) மாநாட்டிற்காக இந்தியா வரவுள்ள நிலையில், அதற்கு முன்னதாகவே இந்த ஒப்பந்தம் செயல்பாட்டுக்கு வந்தது ஒரு மிகப்பெரிய சமிக்ஞையாகப் பார்க்கப்படுகிறது. உலக நாடுகள் தங்களுக்குள் அணிகளாகப் பிரிந்து வரும் சூழலில், இந்தியாவின் இந்தச் சுதந்திரமான வெளியுறவுக் கொள்கை மற்ற நாடுகளுக்கு ஒரு வலுவான செய்தியைச் சொல்லியுள்ளது. அமெரிக்காவின் அழுத்தம் ஒருபுறம் இருந்தாலும், தேசியப் பாதுகாப்பில் இந்தியா சமரசம் செய்து கொள்ளாது என்பதை இந்த ‘ரிலோஸ்’ ஒப்பந்தம் நிரூபித்துள்ளது.
