தமிழக வெற்றி கழகம் தலைமையிலான கூட்டணி அரசுப் பொறுப்பேற்ற பிறகு, மாநிலங்களுக்கு இடையேயான ஒத்துழைப்பை மேம்படுத்தும் மிக முக்கியமான அமைப்பான தென்மண்டல குழுவிற்குத் தற்போது புதிய பிரதிநிதிகளைத் தமிழக அரசு நியமித்துள்ளது.
மத்திய அரசின் கீழ் செயல்படும் இந்த உயர்மட்டக் குழுவில் தமிழகத்தின் குரலை உரக்க ஒலிக்கச் செய்வதற்காக, முதலமைச்சர் சி. ஜோசப் விஜய் தலைமையிலான குழுவில் இரண்டு முக்கிய அமைச்சர்கள் முறைப்படி நியமிக்கப்பட்டுள்ளனர்.
தமிழக அரசியல் களத்தில் டிவிேக அரசின் இந்த முதல் அதிகாரப்பூர்வ தென்மண்டல குழு நியமனம் ஒரு மிகப்பெரிய நிர்வாக நகர்வாகப் பார்க்கப்படுகிறது.
இதன்படி, தமிழக மின்சாரம் மற்றும் சட்டத்துறை அமைச்சரான ஆர். நிர்மல்குமார் மற்றும் பள்ளிக்கல்வி, தமிழ் வளர்ச்சி மற்றும் செய்தித்துறை அமைச்சரான ராஜ்மோகன் ஆகியோர் தென்மண்டல குழுவின் உறுப்பினர்களாகப் பெயர் குறிப்பிடப்பட்டுள்ளனர்.
இவர்கள் இருவரும் முதலமைச்சர் விஜய்யுடன் இணைந்து, அண்டை மாநிலங்களான கேரளா, கர்நாடகா, ஆந்திரா மற்றும் தெலுங்கானா ஆகிய மாநிலங்களுடன் தமிழகத்தின் நலன் சார்ந்த விவகாரங்களில் பேச்சுவார்த்தை நடத்துவார்கள்.
நிர்வாக ரீதியாக இந்த விவகாரங்களைக் கையாளுவதற்காக, தமிழக அரசின் தலைமைச் செயலாளர் எம். சாய்குமார் முதன்மை ஆலோசகராகத் தொடர்கிறார். அவருக்குத் துணையாக, உள்துறை மற்றும் மதுவிலக்கு ஆயத்தீர்வைத் துறையின் கூடுதல் தலைமைச் செயலாளரான கே. மணிவாசன் இரண்டாவது ஆலோசகராக நியமிக்கப்பட்டுள்ளார்.
1956-ஆம் ஆண்டு மாநில மறுசீரமைப்புச் சட்டத்தின் கீழ் பிறப்பிக்கப்பட்டுள்ள இந்தப் புதிய அரசாணை, கடந்த 2021-ஆம் ஆண்டு முந்தைய திமுக அரசால் செய்யப்பட்ட நியமனங்களுக்குப் பதிலாக அமலுக்கு வந்துள்ளது.
தென்மண்டல குழு என்பது வெறும் ஆலோசனை அமைப்பு மட்டுமல்ல; இது உள்கட்டமைப்பு மேம்பாடு, உள்நாட்டுப் பாதுகாப்பு, எல்லை மேலாண்மை மற்றும் மிக முக்கியமாக நதிநீர் பங்கீடு தொடர்பான சிக்கல்களைத் தீர்க்கும் ஒரு வலிமையான தளமாகும்.
குறிப்பாகக் காவிரி நீர் விவகாரம் மற்றும் மேகதாது அணை போன்ற விவகாரங்களில் அண்டை மாநிலங்களுடன் சுமுகமான உறவைப் பேணவும், அதே நேரத்தில் தமிழகத்தின் உரிமைகளை நிலைநாட்டவும் இந்தப் புதிய அமைச்சர்கள் குழு ஒரு மிகப்பெரிய பங்கினை ஆற்றும் என்று எதிர்பார்க்கப்படுகிறது.
ஏற்கனவே கடந்த திமுக ஆட்சியில் மு.க.ஸ்டாலின், டி.ஆர்.பி. ராஜா மற்றும் பி.கே. சேகர்பாபு ஆகியோர் இந்தப் பொறுப்புகளில் இருந்த நிலையில், தற்போது தமிழக வெற்றி கழகத்தின் இந்த புதிய டீம் எத்தகைய மாற்றங்களைக் கொண்டுவரப் போகிறது என்பது அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது.
கூட்டாட்சித் தத்துவத்தை வலுப்படுத்தவும், தென்மாநிலங்களின் பொதுவான பிரச்சினைகளுக்குத் தீர்வு காணவும் முதலமைச்சர் விஜய்யின் இந்தப் புதிய நியமனங்கள் ஒரு ஆக்கப்பூர்வமான நகர்வாகப் பார்க்கப்படுகிறது.
வரும் நாட்களில் நடைபெறவுள்ள தென்மண்டல குழு கூட்டத்தில் தமிழகத்தின் உரிமைகளுக்காக இந்தப் புதிய அமைச்சர்கள் குழு எத்தகைய வாதங்களை முன்வைக்கப் போகிறது என்பதை நாம் பொறுத்திருந்துதான் பார்க்க வேண்டும்.
