அரிசி விலை உயர்வு பொதுமக்களின் வாழ்வை நேரடியாக பாதிக்கிறது. இதனை கட்டுப்படுத்த மத்திய அரசு “பாரத் அரிசி” திட்டத்தை அறிமுகப்படுத்தியுள்ளது. இந்த திட்டத்தின் கீழ், ஒரு கிலோ அரிசி ரூ.29க்கு விற்பனை செய்யப்படுகிறது. 5 கிலோ மற்றும் 10 கிலோ பைகளில் இந்த அரிசி கிடைக்கிறது. ஆரம்ப கட்டத்தில் மத்திய அரசின் கையிருப்பில் உள்ள அரிசி, பொதுமக்களுக்காக ஒதுக்கப்பட்டுள்ளது.
அரசு கூட்டுறவு கடைகள், நாஃபெட் (NAFED), NCCF போன்ற அமைப்புகள், மேலும் சில பகுதிகளில் ஆன்லைன் மற்றும் மொபைல் வாகனங்கள் வழியாக இது விநியோகிக்கப்படுகிறது. இதற்கு முன்பே “பாரத் ஆட்டா” “பாரத் தால்” போன்ற பொருட்கள் அறிமுகம் செய்யப்பட்டுள்ளன. இப்போது அரிசி சேர்த்ததன் மூலம் “Bharat” பிராண்ட் பொதுமக்களின் அன்றாட உணவுப் பொருட்களில் முக்கிய பங்கு வகிக்கிறது.
இந்த திட்டத்தின் முக்கிய நோக்கம், உயர்ந்த உணவுப் பொருள் விலைகளால் பாதிக்கப்படும் நடுத்தர மற்றும் குறைந்த வருமானக் குடும்பங்களுக்கு நிவாரணம் அளிப்பது. ஆனால் சில இடங்களில் தரம் குறித்த குற்றச்சாட்டுகளும், கிடைக்கும் அளவில் சிக்கல்களும் எழுந்துள்ளன. மேலும், தேர்தல் காலத்தில் அறிமுகப்படுத்தப்பட்டதால், இது அரசியல் நோக்கத்துடனும் பார்க்கப்படுகிறது.
எனினும், குறைந்த விலையில் அரிசி கிடைப்பது பெரும்பான்மையான மக்களுக்கு ஒரு நிம்மதி. இந்த முயற்சி உண்மையிலேயே நீடித்து, பொதுமக்களின் அன்றாட செலவுகளை குறைத்தால், அது ஒரு முக்கிய முன்னெடுப்பாக மாறும்.
