நீங்கள் ஒரு ஐபோன் பயனராக இருந்தால், உங்களுக்காகவே ஆப்பிள் நிறுவனம் ஒரு முக்கியமான, அதே சமயம் ஒரு பகீர் எச்சரிக்கையை விடுத்துள்ளது. “உங்கள் போனில் கூகுள் குரோம் பிரவுசரையும், கூகுள் செயலியையும் பயன்படுத்துவதை நிறுத்துங்கள். அது உங்கள் அந்தரங்கத் தகவல்களைத் திருடுகிறது,” என்று ஆப்பிள் நிறுவனம் வெளிப்படையாகவே கூறியிருப்பது, டெக் உலகில் ஒரு பெரிய புயலைக் கிளப்பியுள்ளது.
ஆப்பிள் ஏன் இப்படி ஒரு எச்சரிக்கையை விடுக்கிறது? “ஃபிங்கர்பிரிண்டிங்” (Fingerprinting) என்று சொல்லப்படும் ஒரு ரகசிய தொழில்நுட்பத்தின் மூலம், கூகுள் உங்களைக் கண்காணிப்பதாக ஆப்பிள் குற்றம் சாட்டுகிறது. இந்த “ஃபிங்கர்பிரிண்டிங்” என்றால் என்ன? நீங்கள் என்ன போன் வைத்திருக்கிறீர்கள், என்னென்ன செயலிகளைப் (Apps) பயன்படுத்துகிறீர்கள், எந்த ஊரிலிருந்து இணையத்தைப் பார்க்கிறீர்கள் போன்ற பல சின்ன சின்ன தகவல்களை ஒன்று சேர்த்து, உங்களுக்கென ஒரு தனி ‘டிஜிட்டல் கைரேகையை’ உருவாக்கி, நீங்கள் இணையத்தில் என்னவெல்லாம் செய்கிறீர்கள் என்பதைக் கண்காணிப்பதுதான் இந்தத் தொழில்நுட்பம்.
ஆனால், ஆப்பிளின் சொந்த பிரவுசரான ‘சஃபாரி’ (Safari), இப்படி டிஜிட்டல் கைரேகை எடுக்க விடாமல் தடுப்பதாக ஆப்பிள் கூறுகிறது. சஃபாரி, உங்கள் போனின் அடையாளத்தை, மற்ற கோடிக்கணக்கான ஐபோன்களைப் போலவே காட்டும். இதனால், விளம்பர நிறுவனங்களால், உங்களைத் தனியாக அடையாளம் கண்டு, பின்தொடர முடியாது. ஆனால், கூகுள் குரோம் இப்படி ஒரு பாதுகாப்பைத் தருவதில்லை என்று ஆப்பிள் அடித்துச் சொல்கிறது.
சரி, அப்படியென்றால், சஃபாரி பிரவுசரைப் பயன்படுத்தினால், நாம் பாதுகாப்பாக இருக்கலாமா? அங்கும் ஒரு பெரிய ஆபத்து காத்திருக்கிறது. நம்மில் பலரும், சஃபாரி பிரவுசருக்குள் சென்று, கூகுள் தேடுபொறியைத்தான் பயன்படுத்துவோம். அப்படித் தேடும்போது, பக்கத்தின் கீழே, “கூகுள் செயலியை முயற்சி செய்யுங்கள்” (Try Google App) என்று ஒரு பெரிய நீல நிற பட்டன் வரும். அந்தப் பட்டனை மட்டும் தெரியாமல் கூடத் தொட்டுவிடாதீர்கள் என்று ஆப்பிள் எச்சரிக்கிறது.
ஏனென்றால், கூகுள் குரோமை விட, இந்த கூகுள் செயலி, பல மடங்கு அதிகமான உங்கள் தனிப்பட்ட தகவல்களைச் சேகரித்து, அதை உங்கள் பெயருடனே சேமித்து வைத்துக்கொள்ளும் என்று ஆப்பிள் கூறுகிறது. ஆக, உங்கள் தனிப்பட்ட தகவல்கள் உங்களுக்கு மட்டும்தான் சொந்தம் என்று நீங்கள் நினைத்தால், ஆப்பிள் சொல்லும் இந்த ஆலோசனையைக் கேட்பது நல்லது. கூகுள் குரோமைத் தவிர்த்துவிட்டு, சஃபாரியைப் பயன்படுத்துவதும், அந்த நீல நிற பட்டனைத் தொடாமல் இருப்பதும், உங்கள் டிஜிட்டல் பாதுகாப்பிற்கு மிகவும் அவசியம்.
