இந்திய ரிசர்வ் வங்கி, நாட்டின் பொருளாதாரத்தை ஊக்குவிக்க, ரெப்போ விகிதத்தை 50 அடிப்படை புள்ளிகள் குறைத்து 5.5% ஆகக் குறைத்துள்ளது. இதனுடன் சேர்ந்து ரொக்க இருப்பு விகிதமும் 3% ஆக குறைக்கப்பட்டது. இதன் மூலம், வங்கி முறைமையில் கூடுதலாக ரூ.2.5 லட்சம் கோடி வரை நிதி புழக்கத்திற்கு வரும் என எதிர்பார்க்கப்படுகிறது.
இந்த முடிவுக்கு ஆதரவாக ரிசர்வ் வங்கியின் பணவியல் கொள்கைக் குழுவில் 6 பேரில் 5 பேர் வாக்களித்தனர். இது, நாட்டில் கடன் பெறும் வசதியை உயர்த்தி, பொருளாதார நடவடிக்கைகளை ஊக்குவிக்க வங்கியின் திட்டமிடலாகும்.
இதனைத் தொடர்ந்து, HDFC வங்கி தனது அனைத்து MCLR விகிதங்களையும் 10 புள்ளிகள் குறைத்துள்ளது. இந்த புதிய விகிதங்கள் ஜூன் 7 முதல் அமலில் வந்துள்ளன.
குறிப்பாக ஒரு மாத விகிதங்கள் 8.90% ஆகவும், மூன்று மாதங்கள் 8.95% ஆகவும், ஆறு மாதங்கள் மற்றும் ஒரு வருடம் 9.05%ஆகவும், இரண்டு மற்றும் மூன்று ஆண்டுகளுக்கான விகிதங்கள் 9.10% ஆகவும் மாற்றப்பட்டுள்ளன.
மற்றொரு முக்கிய அறிவிப்பாக, பஞ்சாப் நேஷனல் வங்கி தனது ரெப்போ இணைப்பு விகிதத்தை 50 புள்ளிகள் குறைத்து, புதிய வீட்டு கடன்களை ஆண்டுக்கு 7.45% என்ற விகிதத்தில் வழங்க தொடங்கியுள்ளது. வாகனக் கடன்கள் ஆண்டுக்கு 7.80% இல் தொடங்குகின்றன. புதிய விகிதங்கள் ஜூன் 9 முதல் நடைமுறையில் உள்ளன.
இது குறைந்த வட்டியில் கடன் பெறும் வாய்ப்பை வழங்குவதால், வீடு வாங்குபவர்களும், வாகனக் கடன் எடுக்க நினைப்பவர்களும், சிறு வணிகத்துறை சார்ந்தோருக்கும் இது மிகப் பெரிய நன்மையாகும். ஏற்கனவே RLLR இணைப்பில் உள்ள கடனாளிகளுக்கு தானாகவே EMI தொகை குறையும்.
இந்த நிதி சலுகைகள், பொதுமக்கள் வாழ்க்கையை சீராக்கவும், சிறு தொழில்கள் வளர்ச்சியை எளிதாக்கவும் அமைந்துள்ளன. வட்டி குறைப்பு, எப்போதும் உங்கள் கனவுகளை அடைவதற்கான வாய்ப்பை சற்று அருகில் கொண்டு வருகிறது.