ஈரான் மற்றும் அமெரிக்கா இடையிலான போர் களம் இப்போது நேரடி தாக்குதல்களைத் தாண்டி, சமூக வலைதளப் பக்கங்களில் வார்த்தைப் போராக விஸ்வரூபம் எடுத்துள்ளது. அமெரிக்க அதிபர் டொனால்ட் டிரம்ப், ஈரானின் எண்ணெய் கிணறுகள் முற்றுகையால் வெடிக்கும் என்று எச்சரித்திருந்த நிலையில், ஈரான் நாடாளுமன்ற சபாநாயகர் முகமது பாகர் காலிபாப் அதை மிகுந்த கேலியுடன் நிராகரித்துள்ளார்.
“மூன்று நாட்கள் முடிந்துவிட்டன, இதுவரை ஒரு கிணறு கூட வெடிக்கவில்லை. வேண்டுமானால் இதை 30 நாட்களுக்கு நாங்கள் நேரலை (Livestream) செய்து காட்டுகிறோம்” என்று அவர் சவால் விடுத்திருப்பது சர்வதேச அளவில் பெரும் பரபரப்பை ஏற்படுத்தியுள்ளது.
அமெரிக்காவின் இந்த முற்றுகை உத்தி ஈரானின் எண்ணெய் உற்பத்தியைக் குலைத்துவிடும் என்று டிரம்ப் நம்புகிறார். ஆனால், அதை முற்றிலுமாகப் பொய் என்று நிராகரிக்கும் காலிபாப், ஈரானின் எல்லைகள் மற்றும் வளங்களை அமெரிக்காவால் முடக்க முடியாது என்று உறுதியாகக் கூறுகிறார். ஈரான் நாடாளுமன்ற சபாநாயகரும், அமைதிப் பேச்சுவார்த்தையின் முக்கியப் புள்ளியுமான காலிபாப், அமெரிக்காவின் அச்சுறுத்தல்களைத் துச்சமென மதித்து வருகிறார்.
அமெரிக்காவின் கடல் முற்றுகை நடவடிக்கையை வெறும் ‘நகைச்சுவை’ என்று அவர் வர்ணித்திருப்பது, இரு நாடுகளுக்கும் இடையே நிலவும் இராஜதந்திர மோதல் எந்த அளவுக்கு முற்றியிருக்கிறது என்பதைக் காட்டுகிறது.பெர்சிய வளைகுடா தினத்தை முன்னிட்டு காலிபாப் விடுத்த மற்றொரு அறிக்கை, அமெரிக்காவை நேரடியாகச் சீண்டும் வகையில் அமைந்திருந்தது.
ஹார்முஸ் நீரிணைப் பகுதியை ஈரான் தனது முழு கட்டுப்பாட்டில் வைத்திருப்பதாகவும், இனிவரும் காலங்களில் அமெரிக்காவின் தலையீடு இல்லாத ஒரு வளைகுடாவைத் தாங்கள் உருவாக்குவோம் என்றும் அவர் முழங்கியுள்ளார். பிராந்தியத்தில் அமெரிக்காவின் ஆதிக்கம் முடிவுக்கு வந்துவிட்டதாகத் தெரிவித்துள்ள அவர், ஈரானின் அணுசக்தி மற்றும் ஏவுகணைத் திட்டங்கள் குறித்து அமெரிக்கா கவலைப்படுவதை ஏளனமாகப் பார்க்கிறார்.
பேச்சுவார்த்தைகள் ஒருபுறம் முட்டுக்கட்டையில் இருக்கும் சூழலில், ஈரானியத் தலைவர்கள் இத்தகைய அதிரடிப் பதிலடிகளைக் கொடுத்து வருவது, அமெரிக்காவை எரிச்சலடையச் செய்துள்ளது. “குட் லக்” என்று டிரம்பைக் கிண்டல் செய்யும் காலிபாப்பின் இந்தத் துணிச்சலான பேச்சு, ஈரானின் தற்போதைய போர்க்குணத்தை வெளிப்படுத்துகிறது.
பேச்சுவார்த்தை என்ற பெயரில் அமெரிக்கா வைக்கும் நிபந்தனைகளை ஈரான் எள்ளி நகையாடுவதன் மூலம், இந்தப் போர் எதை நோக்கிச் செல்லப்போகிறது என்ற கேள்வி உலக நாடுகளிடையே எழுந்துள்ளது. ஒரு பக்கம் டிரம்ப் முற்றுகையை வலுப்படுத்துகிறார், மறுபக்கம் ஈரான் தலைவர்கள் அதைத் துச்சமென மதிக்கிறார்கள். இந்த வார்த்தைப் போர் உலக அரசியலை அடுத்த கட்டத்திற்கு எடுத்துச் செல்லுமா அல்லது அமைதிப் பேச்சுவார்த்தைகளுக்கு வழிவகுக்குமா? என்பதைப் பொறுத்திருந்துதான் பார்க்க வேண்டும்.
