தமிழகத்தின் கிருஷ்ணகிரி மற்றும் தருமபுரி மாவட்டங்களில் மாம்பழ விவசாயிகள் கடும் நெருக்கடியை எதிர்கொண்டு வருகின்றனர். போதிய விலை கிடைக்காததால், பல விவசாயிகள் தங்களது மாம்பழங்களை சாலையோரங்களிலும் குப்பை மேடுகளிலும் கொட்டி போராட்டம் நடத்தும் நிலை உருவாகியுள்ளது. இந்த பிரச்சினைக்கு பின்னால் பல கோடி ரூபாய் மதிப்பிலான மாம்பழக் கூழ் தொழில் தொடர்புடையதாக கூறப்படுகிறது.
ஆந்திரப் பிரதேசத்தின் சித்தூர் மற்றும் திருப்பதி மாவட்டங்களில் இந்தியாவின் மிகப்பெரிய மாம்பழக் கூழ் தயாரிப்பு தொழிற்சாலைகள் செயல்பட்டு வருகின்றன. தமிழ்நாட்டின் கிருஷ்ணகிரி மற்றும் தருமபுரி மாவட்டங்களில் விளையும் தோட்டாபுரி ரக மாம்பழங்களில் சுமார் 80 சதவீதம் இந்த தொழிற்சாலைகளுக்கே அனுப்பப்பட்டு வந்தன. அதிக சுவை மற்றும் அதிகளவு கூழ் கிடைப்பதால் இந்த ரகத்திற்கு அதிக தேவை இருந்து வந்தது.
இந்த ஆண்டு ஆந்திர அரசு தனது மாநில விவசாயிகளை பாதுகாக்கும் நோக்கில், ஒரு கிலோ தோட்டாபுரி மாம்பழத்திற்கு ரூ.8 கொள்முதல் விலையும், ரூ.4 மானியமும் வழங்கி மொத்தம் ரூ.12 கிடைக்க ஏற்பாடு செய்தது. ஆனால் தமிழ்நாடு மற்றும் கர்நாடகாவில் அதிக விளைச்சல் காரணமாக சந்தை விலை ரூ.5 முதல் ரூ.6 வரை சரிந்தது. இதனால் ஆந்திர தொழிற்சாலைகள் மலிவான வெளிமாநில மாம்பழங்களை வாங்கத் தொடங்கின. இதையடுத்து, ஆந்திர நிர்வாகம் எல்லைப் பகுதிகளில் சோதனைச் சாவடிகளை அமைத்து வெளிமாநில மாம்பழ லாரிகள் நுழைவதற்கு கட்டுப்பாடு விதித்தது.
இதனால் சித்தூர் தொழிற்சாலைகளே முக்கிய சந்தையாக இருந்த கிருஷ்ணகிரி, தருமபுரி விவசாயிகள் கடுமையாக பாதிக்கப்பட்டுள்ளனர். தற்போது சில வியாபாரிகள் ஒரு கிலோ மாம்பழத்திற்கு ரூ.2 மட்டுமே வழங்க முன்வருகின்றனர். ஆனால் உற்பத்திச் செலவு கிலோவுக்கு ரூ.8-ஐ தாண்டுவதால் விவசாயிகள் பெரும் இழப்பை சந்திக்கின்றனர்.
இந்த நிலையை சமாளிக்க, தமிழக அரசு நேரடியாக கொள்முதல் மையங்களை அமைத்து கிலோவுக்கு ரூ.15 முதல் ரூ.20 வரை விலை வழங்க வேண்டும் என்றும், கூட்டுறவு மாங்கூழ் தொழிற்சாலைகள் மற்றும் நவீன குளிர்சாதன கிடங்குகள் அமைக்க வேண்டும் என்றும் விவசாயிகள் கோரிக்கை விடுத்துள்ளனர்.
