தமிழக அரசியல் வட்டாரத்தில் தற்போது ஒரு மிகப்பெரிய ‘அமைச்சரவை அதிரடி’ குறித்த தகவல்கள் கசிந்து பெரும் பரபரப்பை ஏற்படுத்தியுள்ளது. முதலமைச்சர் விஜய் தனது அமைச்சரவையில் உள்ள அமைச்சர்களின் செயல்பாடுகள் மற்றும் புகார்கள் குறித்துத் தலைமைச் செயலாளர் சாய் குமார் மூலம் ஒரு ரகசிய ஆய்வு அறிக்கையைத் தயார் செய்துள்ளார். இந்த ரகசிய ‘பெர்ஃபார்மன்ஸ் ரிப்போர்ட்’ அடிப்படையில், வரும் செப்டம்பர் மாதம் நிதிநிலை அறிக்கை கூட்டத்தொடர் முடிந்தவுடன், நான்கு அமைச்சர்களைப் பதவியிலிருந்து நீக்க முதலமைச்சர் அதிரடி முடிவெடுத்துள்ளதாகத் தெரிகிறது.
இந்த ‘எக்சிட்’ பட்டியலில் உயர்கல்வித்துறை அமைச்சர் விஸ்வநாதன், போக்குவரத்துத்துறை அமைச்சர் விஜய தமிழன் பார்த்திபன், சமூக நலத்துறை அமைச்சர் ஜெகதீஸ்வரி மற்றும் மனிதவள மேம்பாட்டுத்துறை அமைச்சர் சரத்குமார் ஆகியோரின் பெயர்கள் அடிபடுகின்றன. இதில் விஸ்வநாதன் மற்றும் பார்த்திபன் ஆகியோருக்கு முதலமைச்சர் ஏற்கனவே பலமுறை எச்சரிக்கை விடுத்தும் அவர்கள் மீதான புகார்கள் குறையவில்லை எனக் கூறப்படுகிறது. குறிப்பாக, அமைச்சர் ஜெகதீஸ்வரி மீது சமூக விரோதிகளுடன் தொடர்பு வைத்திருந்த புகாரும், அமைச்சர் சரத்குமார் மீது பொது இடத்தில் போதைப்பொருள் பயன்படுத்தியதாக எழுந்த மிகக் கடுமையான குற்றச்சாட்டுகளுமே இந்தத் தூக்கல் நடவடிக்கைக்கு முக்கியக் காரணமாகச் சொல்லப்படுகிறது.
அமைச்சரவை மாற்றத்தின் ஒரு பகுதியாக, அமைச்சர்கள் கீர்த்தனா மற்றும் கமலி ஆகியோரின் இலாகாக்கள் மாற்றப்பட உள்ளன. அதேபோல், கூட்டணி கட்சியான காங்கிரஸைச் சேர்ந்த ராஜேஷ் குமாருக்குத் தற்போதுள்ள சுற்றுலாத் துறையை விடக் கூடுதல் முக்கியத்துவம் வாய்ந்த துறை ஒதுக்கப்பட வாய்ப்புள்ளது. மேலும், விடுதலை சிறுத்தைகள் கட்சியின் பிரதிநிதியாக வன்னி அரசுக்கும் அமைச்சரவையில் இடம் கிடைக்குமா என்பது முதலமைச்சர் விஜய்யின் இறுதி முடிவிலேயே உள்ளது. இந்த மாற்றங்கள் அனைத்தும் நிர்வாகத்தை இன்னும் செம்மைப்படுத்துவதற்காக எடுக்கப்படும் முதல் கட்ட நடவடிக்கையாகப் பார்க்கப்படுகிறது.
இந்த அதிரடி மாற்றத்தின் இரண்டாம் கட்டம், வரவிருக்கும் இடைத்தேர்தல்களுக்குப் பிறகு நிகழும் என எதிர்பார்க்கப்படுகிறது. குறிப்பாக, அதிமுகவிலிருந்து விலகி தவெக-வில் இணைந்த சி. விஜயபாஸ்கர், எம்.ஆர். விஜயபாஸ்கர் மற்றும் மரகதம் குமாரவேல் போன்ற சீனியர் தலைவர்களை அமைச்சரவையில் அமர வைக்க முதலமைச்சர் விஜய் திட்டமிட்டுள்ளார். “தவறு செய்தால் தயவு தாட்சண்யமின்றி நடவடிக்கை” என்ற விஜய்யின் இந்த அதிரடிப் போக்கு, தமிழக அரசு இயந்திரத்தில் ஒரு புதிய பயத்தையும் பொறுப்புணர்வையும் ஏற்படுத்தியுள்ளது.
