தமிழக அரசியல் களம் தற்போது ஒரு மிகப்பெரிய மாற்றத்தை நோக்கி நகர்ந்து கொண்டிருக்கிறது. குறிப்பாக, முதலமைச்சர் விஜய் தலைமையிலான தமிழக வெற்றிக் கழக அரசுக்கும், பிரதான எதிர்க்கட்சியான திமுக-வுக்கும் இடையிலான மோதல், தற்போது ‘ரெய்டு’ அஸ்திரங்களால் உச்சத்தை எட்டியுள்ளது.
கடந்த சில நாட்களாக முன்னாள் அமைச்சர் செந்தில் பாலாஜி மற்றும் அவருக்கு நெருக்கமானவர்களின் வீடுகளில் லஞ்ச ஒழிப்புத் துறையினர் நடத்தி வரும் அதிரடி சோதனைகள், வெறும் சட்ட நடவடிக்கையாக மட்டும் பார்க்கப்படவில்லை. இது திமுக-வை அரசியல் ரீதியாக முடக்கும் முதல்வர் விஜய்யின் ஒரு மிகப்பெரிய வியூகமாகவே பார்க்கப்படுகிறது.
லஞ்ச ஒழிப்புத் துறையின் கூடுதல் பொறுப்பைக் கவனித்து வரும் ஐஜி மகேஸ்வரி ஐபிஎஸ் தலைமையிலான குழு, அடுத்தடுத்த ஊழல் புகார்களைத் தூசி தட்டி வருகிறது.
இந்த அரசியல் மோதலில் ‘ஊழல் நிறைந்த திமுக vs ஊழலற்ற தவெக’ என்ற பிம்பத்தை மிக அழுத்தமாக மக்களிடம் கொண்டு செல்ல முதலமைச்சர் விஜய் முயற்சி செய்து வருகிறார்.
குறிப்பாகச் செந்தில் பாலாஜி மீது விஜய் இவ்வளவு தீவிரம் காட்டுவதற்குப் பின்னால் ஒரு மிகப்பெரிய அரசியல் ரணம் இருப்பதாகக் கூறப்படுகிறது. தமிழக வெற்றிக் கழகத்தின் வரலாற்றில் ஒரு கறுப்புப் பக்கமாகப் பதிவாகியிருக்கும் கரூர் கூட்ட நெரிசல் சம்பவத்திற்குச் செந்தில் பாலாஜி தான் காரணம் எனத் தவெக தரப்பு உறுதியாக நம்புகிறது.
கரூரில் ‘பாட்டிலுக்கு 10 ரூபாய் கூடுதல்’ என்று முதல்வர் விஜய் பாடிய பாடலில் தொடங்கி, தற்போது செந்தில் பாலாஜி கவனித்து வந்த டாஸ்மாக் துறையின் பழைய கோப்புகளை லஞ்ச ஒழிப்புத்துறை ஆய்வு செய்வது வரை, அனைத்தும் ஒரு திட்டமிட்ட அரசியல் பதிலடியாகவே பார்க்கப்படுகிறது.
அதேசமயம், வரும் பட்ஜெட் கூட்டத்தொடரில் திமுக முன்னாள் அமைச்சர்களின் ஊழல் பட்டியலை நிதியமைச்சர் மரிய வில்சன் வெளியிடப்போவதாக அறிவித்திருப்பது, அண்ணா அறிவாலயத்தைத் திகைக்க வைத்துள்ளது.
இது வெறும் அரசியல் பழிவாங்கும் நடவடிக்கையா அல்லது முறையான ஆதாரங்களுடன் கூடிய எஃப்.ஐ.ஆர் நடவடிக்கையா என்பதைப் பொறுத்தே இதன் தாக்கம் அமையும்.
ஒருவேளை ஆதாரங்கள் இன்றி வெறுமனே பட்டியலை வெளியிட்டால், அது சட்டசபையில் மிகப்பெரிய அமளிக்கும், வெளிநடப்புகளுக்கும் வழிவகுக்கும் என அரசியல் விமர்சகர்கள் எச்சரிக்கின்றனர். மறுபுறம், திமுக-வின் உட்கட்சி மோதல்கள் மற்றும் கூட்டணிக் குழப்பங்களைத் தங்களுக்குச் சாதகமாக மாற்றத் தவெக முயற்சி செய்து வருகிறது.
ஸ்டாலின் தலைமையிலான திமுக, இந்தத் தொடர் நெருக்கடிகளை எப்படி எதிர்கொள்ளப் போகிறது என்பதுதான் தற்போதைய கேள்வி. மூத்த பத்திரிகையாளர்கள் கருத்துப்படி, இந்த நெருக்கடிகள் திமுக-விற்குத் தனது கூட்டணிக் கணக்குகளைச் சரி செய்யவும், மீண்டும் வலுவாக எழவும் ஒரு வாய்ப்பாக அமையலாம்.
இருப்பினும், ஊழல் புகார்கள் மக்கள் மத்தியில் ஏற்படுத்தும் தாக்கம் என்பது தேர்தல் களத்தில் எதிரொலிக்கும் என்பதால், இரு கட்சிகளுமே மிகக் கவனமாகக் காய்களை நகர்த்தி வருகின்றன. தமிழக அரசியல் களத்தின் இந்த அனல் பறக்கும் மோதல், வரும் நாட்களில் இன்னும் பல அதிரடித் திருப்பங்களை ஏற்படுத்தும் என்பதில் சந்தேகமில்லை.
