கிரீன்லாந்தின் மேற்குப் பகுதியில் உள்ள இலுலிசாட் (Ilulissat) கடற்கரையில், ஒரு ராட்சத பனிப்பாறை திடீரென தலைகீழாகக் கவிழ்ந்து புரண்ட வீடியோ தற்போது இணையதளங்களில் காட்டுத்தீயாகப் பரவி வருகிறது.
“பனிப்பாறைகளின் தலைநகரம்” என்று அழைக்கப்படும் இந்த இலுலிசாட் பகுதியில், கடந்த ஜூலை 25-ஆம் தேதி அரங்கேறிய இந்த இயற்கையின் அதிசயம், பார்ப்பவர்களை ஒரு நிமிடம் திகைக்க வைத்துள்ளது.
கடலுக்கு அடியில் பல நூறு அடி ஆழத்தில் மறைந்திருந்த பனிப்பாறையின் அடிப்பகுதி, ஒட்டுமொத்தமாக மேலே வந்தபோது எழுந்த ராட்சத அலைகள் அந்தப் பகுதியையே ஒரு குலுக்கு குலுக்கிவிட்டன. உள்ளூர்வாசி ஒருவரால் படம் பிடிக்கப்பட்ட இந்த வீடியோ, இயற்கையின் பேராற்றலை உலகிற்கு மீண்டும் ஒருமுறை பறைசாற்றியுள்ளது.
ஒரு பிரம்மாண்டமான பனிப்பாறை ஏன் இப்படித் தலைகீழாகக் கவிழ்கிறது என்பதற்குப் பின்னால் ஒரு சுவாரசியமான அறிவியல் காரணம் உள்ளது. கடலுக்கு அடியில் இருக்கும் பனிப்பாறையின் பகுதி சீரற்ற முறையில் உருகத் தொடங்கும்போது, அதன் மைய ஈர்ப்பு விசை மாறுகிறது
ஒரு கட்டத்தில் மேலே இருக்கும் பனியின் எடையைத் தாங்க முடியாமல், அந்தப் பாறை நிலைதடுமாறி அப்படியே தலைகீழாகப் புரண்டு விடுகிறது. இது கிரீன்லாந்து போன்ற துருவப் பகுதிகளில் அடிக்கடி நடக்கும் ஒரு சாதாரண நிகழ்வுதான் என்றாலும், எந்த நேரத்தில் நடக்கும் என்று யாராலும் கணிக்க முடியாது.
இந்தப் பனிப்பாறை கவிழ்ந்தபோது வெளிப்பட்ட ஆற்றல், பல டன் வெடிமருந்துகள் வெடிப்பதற்குச் சமமான அதிர்வுகளை நீரில் ஏற்படுத்தியுள்ளது. யுனெஸ்கோ அங்கீகாரம் பெற்ற உலகப் பாரம்பரியச் சின்னமான இந்த இலுலிசாட் ஐஸ்பியோர்டு பகுதியில், உலகின் மிக வேகமாக நகரக்கூடிய பனிப்பாறைகள் உள்ளன.
இதனால், இங்கு இத்தகைய மாற்றங்கள் நிகழ்வது வழக்கமானதுதான். அதிர்ஷ்டவசமாக, இந்தச் சம்பவத்தின் போது அருகில் படகுகள் ஏதும் இல்லாததால் உயிர்ச் சேதங்கள் தவிர்க்கப்பட்டன. இருப்பினும், இத்தகைய பனிப்பாறைகள் கவிழும் போது உருவாகும் ராட்சத அலைகள் கடற்கரைக்கு அருகில் இருப்பவர்களையும், சுற்றுலாப் பயணிகளையும் எளிதில் தாக்கும் என்பதால், மக்கள் பாதுகாப்பான தூரத்தில் இருக்குமாறு எச்சரிக்கப்பட்டுள்ளனர்.
இணையவாசிகள் பலரும் இதைப் பார்த்து “அழகாகவும் இருக்கிறது, அதே சமயம் அச்சமாகவும் இருக்கிறது” என்று தங்களது வியப்பைப் பகிர்ந்து வருகின்றனர். பருவநிலை மாற்றத்தின் அபாயத்தை உணர்த்தும் ஒரு எச்சரிக்கையாகவும் இந்த நிகழ்வு பார்க்கப்படுகிறது.
source link-
