சட்டமன்றத் தேர்தல் தோல்விக்குப் பிறகு, அதிமுகவை மீண்டும் வலுப்படுத்தும் நோக்கில் அக்கட்சியின் பொதுச்செயலாளர் எடப்பாடி பழனிசாமி தீவிர ஆலோசனைகளில் ஈடுபட்டு வருகிறார். குறிப்பாக, கட்சியில் உள்ள துரோகிகளைப் பற்றிப் பேசி இனி நேரத்தை வீணடிக்க வேண்டாம் என்றும், விரைவில் அனைத்து மட்டங்களிலும் புதிய நிர்வாகிகள் நியமிக்கப்பட உள்ளதாகவும் அவர் அதிரடியாக அறிவித்துள்ளார்.
சென்னை ராயப்பேட்டையில் உள்ள அதிமுக தலைமை அலுவலகத்தில், திருச்சி மாவட்ட அதிமுக நிர்வாகிகளுடனான ஆலோசனைக் கூட்டம் எடப்பாடி பழனிசாமி தலைமையில் நடைபெற்றது. இதில், சட்டமன்றத் தேர்தலில் திருச்சி மாவட்டத்தில் ஏற்பட்ட தோல்வி குறித்தும், வரவிருக்கும் உள்ளாட்சித் தேர்தல் மற்றும் இடைத்தேர்தல் வியூகங்கள் குறித்தும் விரிவாக விவாதிக்கப்பட்டது. இந்த கூட்டத்தில் பேசிய சில நிர்வாகிகள், திமுகவின் பலம் மற்றும் கூட்டணிக் கட்சிகளின் ஆதரவு இல்லாததே திருச்சி மாவட்டத் தோல்விக்குக் காரணம் என்று குறிப்பிட்டனர். ஆனால், இதனை ஏற்க மறுத்த எடப்பாடி பழனிசாமி, லால்குடி தொகுதியில் அதிமுக வெற்றி பெற்றுள்ளதைச் சுட்டிக்காட்டி, தீவிரமாகப் பணியாற்றியிருந்தால் மற்ற தொகுதிகளிலும் எளிதாக வென்றிருக்கலாம் என்று நிர்வாகிகளுக்குப் பதிலடி கொடுத்தார்.
தொடர்ந்து கூட்டத்தில் பேசிய ஒரு நிர்வாகி, முன்னாள் அமைச்சர் சி. விஜயபாஸ்கர் உட்பட மாவட்ட அளவில் கட்சியில் இருக்கும் துரோகிகள் பற்றிப் புகார்களை எழுப்பினார். அதற்குப் பதிலளித்த எடப்பாடி பழனிசாமி, கட்சியை காட்டிக்கொடுத்தவர்களைப் பற்றித் தொடர்ந்து பேசுவதால் எந்தப் பயனும் இல்லை என்று திட்டவட்டமாகக் கூறினார். ஏற்கனவே புதிய மாவட்டச் செயலாளர்கள் நியமிக்கப்பட்டுள்ளதைச் சுட்டிக்காட்டிய அவர், விரைவில் கிளைக் கழகம் முதல் தலைமை வரை அனைத்து மட்டங்களிலும் புதிய நிர்வாகிகள் நியமிக்கப்பட்டு கட்சி முற்றிலும் மறுசீரமைப்பு செய்யப்படும் என்று அறிவித்தார்.
கட்சியினர் அனைவரும் தங்களுக்குள் இருக்கும் கருத்து வேறுபாடுகளை மறந்து, ஒற்றுமையுடன் தேர்தல் பணிகளில் கவனம் செலுத்த வேண்டும் என்று அவர் அறிவுறுத்தியுள்ளார். குறிப்பாக, திருச்சி கிழக்கு தொகுதி இடைத்தேர்தலிலும், வரவிருக்கும் உள்ளாட்சித் தேர்தல் களத்திலும் அதிமுகவின் வெற்றியை உறுதி செய்ய இப்போதிருந்தே களப்பணிகளைத் தொடங்குமாறு தொண்டர்களுக்கு அவர் கட்டளையிட்டுள்ளார். எடப்பாடி பழனிசாமியின் இந்த அதிரடி ஆலோசனைக் கூட்டம் தற்போது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
