மத்திய அரசு ஊழியர்களுக்கும், ஓய்வூதியதாரர்களுக்கும் ஒரு மிகப்பெரிய நற்செய்தி காத்திருக்கிறது. 8-வது சம்பள கமிஷன் குறித்த விவாதங்கள் இப்போது நாடு முழுவதும் சூடுபிடிக்கத் தொடங்கிவிட்டன. சுமார் ஒரு கோடியே 10 லட்சம் ஊழியர்களின் வாழ்வாதாரத்தை மாற்றப்போகும் இந்தச் சம்பள கமிஷனில், எல்லோரையும் உற்றுநோக்க வைத்திருக்கும் ஒரு மந்திரச் சொல் என்றால் அது ‘ஃபிட்மென்ட் ஃபேக்டர்’ (Fitment Factor) தான். அது என்ன ‘ஃபிட்மென்ட் ஃபேக்டர்’? உங்கள் சம்பளம் இதனால் எப்படி உயரும்? விரிவாகப் பார்க்கலாம்.
எளிமையாகச் சொன்னால், ஃபிட்மென்ட் ஃபேக்டர் என்பது ஒரு பெருக்கல் காரணி. அதாவது, உங்கள் பழைய அடிப்படைச் சம்பளத்தை (Basic Pay) புதிய சம்பளக் கட்டமைப்பிற்கு மாற்றப் பயன்படும் ஒரு எண். இதற்கான சூத்திரம் மிகவும் எளிதானது. உங்களுடைய தற்போதைய அடிப்படைச் சம்பளம் மற்றும் இந்த ஃபிட்மென்ட் ஃபேக்டரைப் பெருக்கினால் வரக்கூடியதுதான் உங்கள் புதிய அடிப்படைச் சம்பளம்.
உதாரணத்திற்கு, 7-வது சம்பள கமிஷனில் 2.57 என்ற ஃபிட்மென்ட் ஃபேக்டர் பயன்படுத்தப்பட்டது. இதன் விளைவாக, 6-வது சம்பள கமிஷனில் 7,000 ரூபாயாக இருந்த குறைந்தபட்ச அடிப்படைச் சம்பளம், அப்படியே 18,000 ரூபாயாக எகிறியது. இப்போது வரவிருக்கும் 8-வது சம்பள கமிஷனில் இந்த ஃபிட்மென்ட் ஃபேக்டர் எவ்வளவு இருக்கும் என்பதுதான் மிகப்பெரிய எதிர்பார்ப்பு. அதிகாரப்பூர்வமான அறிவிப்பு இன்னும் வெளியாகவில்லை என்றாலும், பல்வேறு ஆய்வறிக்கைகளின்படி இந்த எண் 2.28 முதல் 3.83 வரை இருக்க வாய்ப்புள்ளதாகச் சொல்லப்படுகிறது.
இந்தியாவில் பொதுவாக 10 ஆண்டுகளுக்கு ஒருமுறை புதிய சம்பள கமிஷன் அமைக்கப்படும். அந்த வகையில், கடந்த 2025 நவம்பர் மாதம் 3-ஆம் தேதி, இந்த 8-வது சம்பள கமிஷன் முறைப்படி அமைக்கப்பட்டது. 1946-ல் தொடங்கப்பட்ட இந்தப் பயணத்தில், இது 8-வது மைல்கல். விலைவாசி உயர்வு மற்றும் தற்போதைய பொருளாதாரச் சூழலுக்கு ஏற்ப அரசு ஊழியர்களின் வருமானத்தைச் சீரமைப்பதே இதன் முக்கிய நோக்கம்.
ஃபிட்மென்ட் ஃபேக்டர் அதிகரித்தால், அடிப்படைச் சம்பளம் மட்டுமல்லாமல், அதன் தொடர்ச்சியாக வழங்கப்படும் அகவிலைப்படி (DA), வீட்டு வாடகைப்படி (HRA) மற்றும் பென்ஷன் தொகையும் கணிசமாக உயரும். 10 ஆண்டுகளுக்கு ஒருமுறை மட்டுமே கிடைக்கும் இந்த அரிய வாய்ப்பு, மத்திய அரசு ஊழியர்களின் பொருளாதார நிலையில் ஒரு மிகப்பெரிய மாற்றத்தை ஏற்படுத்தும் என எதிர்பார்க்கப்படுகிறது. அதிகாரப்பூர்வ அறிவிப்புகள் வரும் வரை, தற்காலிகக் கணக்கீடுகளின்படி உங்கள் சம்பள உயர்வைத் திட்டமிட இந்த ஃபிட்மென்ட் ஃபேக்டர் ஒரு முக்கியக் கருவியாக அமையும்.
