‘ஜன நாயகன்’ திரைப்படம் பல மாதங்களாக நிலவிய குழப்பங்களுக்குப் பிறகு தற்போது வெளியீட்டிற்கு தயாராகியுள்ளது. தளபதி விஜய் நடிப்பில் உருவாகியுள்ள இந்த படம், அவர் கடைசியாக நடிக்கும் படம் என கூறப்படுவதால் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. சமீபத்திய தகவல்களின் படி, படம் மே 8, 2026 அன்று வெளியாக வாய்ப்பு உள்ளது. இருப்பினும் இதுகுறித்த அதிகாரப்பூர்வ அறிவிப்பு இன்னும் வெளியாகவில்லை.
முன்னதாக, 2026 பொங்கலை முன்னிட்டு ஜனவரி 9ஆம் தேதி படத்தை வெளியிட திட்டமிடப்பட்டிருந்தது. ஆனால் பல்வேறு சர்ச்சைகள் மற்றும் தாமதங்களால் அந்த திட்டம் செயல்படவில்லை. குறிப்பாக, சென்சார் போர்டு அனுமதி கிடைப்பதில் ஏற்பட்ட சிக்கல்கள் படத்தின் வெளியீட்டை தள்ளிப்போட காரணமாக அமைந்தன. KVN Productions தயாரிப்பில் உருவான இந்தப் படம், தற்போது அனைத்து பிரச்சனைகளையும் கடந்து வெளியீட்டிற்கு தயாராகியுள்ளது என கூறப்படுகிறது.
மேலும், படம் வெளியீட்டுக்கு முன்பே ஆன்லைனில் லீக் ஆனதாக வந்த தகவல் தயாரிப்பாளர்களுக்கு அதிர்ச்சியளித்தது. இருந்தாலும் விஜய்க்கு இருக்கும் மிகப்பெரிய ரசிகர் ஆதரவு மற்றும் இது அவரது கடைசி படம் என்ற உணர்வு, முதல் நாள் வசூலில் பெரிய சாதனை ஏற்படுத்தும் என எதிர்பார்க்கப்படுகிறது.
இந்தப் படம் ஒரு முன்னாள் போலீஸ் அதிகாரியை மையமாகக் கொண்டு உருவாகியுள்ள அரசியல் மற்றும் ஆக்ஷன் கலந்த கதை கொண்டதாகும். எச். வினோத் இயக்கியுள்ள இப்படத்தில் பாபி தியோல் வில்லனாகவும், பூஜா ஹெக்டே நாயகியாகவும் நடித்துள்ளனர். மேலும் பிரகாஷ் ராஜ், பிரியாமணி உள்ளிட்ட பலர் முக்கிய கதாபாத்திரங்களில் நடித்துள்ளனர்.
