‘மைக் அணைக்கப்பட்டது, பேச அனுமதி வழங்கப்படவில்லை’- மக்கள் மாளிகை குற்றச்சாட்டு

தமிழ்நாடு சட்டசபையின் இந்த ஆண்டின் முதல் கூட்டத் தொடர் இன்று காலை 9.30 மணிக்கு தொடங்கியது. இந்த கூட்டத்தொடரில் பங்கேற்பதற்காக ஆளுநர் ஆர்.என்.ரவி வருகை புரிந்தார்.

இந்நிலையில் இந்த ஆண்டும் ஆளுநர் சட்டப்பேரவையில் இருந்து வெளியேறினார். இதையடுத்து பேசிய தமிழக முதல்வர் மு.க ஸ்டாலின் ஆளுநரின் இந்த நடவடிக்கைக்கு கடும் கண்டனம் தெரிவித்தார்.

இந்நிலையில், சட்டப்பேரவையில் இருந்து வெளியேறியது ஏன் என்ற காரணத்திற்கு மக்கள் மாளிகை விளக்கம் அளித்துள்ளது.

ஆளுநர் பேச முயன்றபோது அவரது மைக் மீண்டும் மீண்டும் அணைக்கப்பட்டது; பேச அனுமதி வழங்கப்படவில்லை.

அந்த உரையில் ஆதாரமற்ற, தவறான மற்றும் வழிதவறச் செய்யும் பல கூறுகள் உள்ளன. மக்களை கடுமையாக பாதிக்கும் பல முக்கிய பிரச்சனைகள் முற்றிலும் புறக்கணிக்கப்பட்டுள்ளன.

பெண்களின் பாதுகாப்பு தொடர்பான பிரச்சனை முற்றிலும் புறக்கணிக்கப்பட்டுள்ளது. POCSO சட்டத்தின் கீழ் பதிவு செய்யப்பட்ட பாலியல் வன்கொடுமை சம்பவங்கள் 55%-க்கும் மேல் உயர்ந்துள்ளன; பெண்கள் மீது நிகழும் பாலியல் தொந்தரவு சம்பவங்கள் 33%-க்கும் மேல் அதிகரித்துள்ளன.

ஒரே ஆண்டில் போதைப்பொருள் பழக்கத்தால் 2,000-க்கும் மேற்பட்டோர் (பெரும்பாலும் இளைஞர்கள்) தற்கொலை செய்துள்ளனர். இது நமது எதிர்காலத்தை தீவிரமாக பாதிக்கிறது. ஆனால் இது அலட்சியமாக புறக்கணிக்கப்பட்டுள்ளது.

தலித் மக்கள்மீது நடக்கும் வன்முறைகளும், தலித் பெண்கள்மீது நிகழும் பாலியல் வன்முறைகளும் கடுமையாக அதிகரித்து வருகின்றன. இருப்பினும் இது முற்றிலும் புறக்கணிக்கப்பட்டுள்ளது.

ஒரே ஆண்டில் சுமார் 20,000 பேர் தமிழ்நாட்டில் தற்கொலை செய்துள்ளனர் — தினமும் சுமார் 65 தற்கொலைகள். நாட்டில் எங்கும் இவ்வளவு கடுமையான நிலை இல்லை. தமிழ்நாடு “இந்தியாவின் தற்கொலைத் தலைநகரம்” என குறிப்பிடப்படும் நிலை உள்ளது.

கல்வித் தரம் தொடர்ந்து சரிந்து வருகிறது. 50%-க்கும் மேற்பட்ட ஆசிரியர் பணியிடங்கள் பல ஆண்டுகளாக காலியாக உள்ளன; விருந்தினர் ஆசிரியர்கள் போராட்ட மனநிலையில் உள்ளனர்.

கிட்டத்தட்ட அனைத்து துறைகளிலும் கீழ்மட்ட ஊழியர்களிடையே பரவலான அதிருப்தி நிலவுகிறது. அவர்கள் மனவேதனையும் அதிருப்தியும் கொண்டுள்ளனர். அவர்களின் நியாயமான கோரிக்கைகளை தீர்க்கும் வழிகள் குறித்து எந்த குறிப்பிடுதலும் இல்லை.

தேசிய கீதம் மீண்டும் அவமதிக்கப்பட்டுள்ளது; அரசியலமைப்பில் குறிப்பிடப்பட்ட அடிப்படை கடமை மீறப்பட்டுள்ளது என மக்கள் மாளிகை விளக்கம் அளித்துள்ளது.