ஆப்பிள் நிறுவனம், தனது புதிய ஐபோன் 17 சீரிஸை உலகெங்கும் அறிமுகப்படுத்தியுள்ளது. இந்த முறை, வழக்கமான மாடல்களுடன், புத்தம் புதிய ஐபோன் 17 ஏர் என்ற மெல்லிய மற்றும் இலகுவான மாடலையும் களமிறக்கி, எல்லோரையும் ஆச்சரியப்படுத்தியுள்ளது. புதிய ஐபோன் வந்துவிட்டாலே, நம்மில் பலருக்கும் வரும் ஒரு முக்கியமான கேள்வி, “இதை இந்தியாவிலேயே வாங்கலாமா? இல்ல, அமெரிக்காவுல இருந்து யாரையாவது எடுத்துட்டு வரச் சொல்லலாமா?” என்பதுதான்.
வாங்க, ஐபோன் 17 சீரிஸின் இந்திய மற்றும் அமெரிக்க விலைகளை ஒப்பிட்டு, எங்கே வாங்கினால் லாபம் என்று முழுமையாகப் பார்க்கலாம்.
முதலில், இந்தியாவில் நான்கு மாடல்களின் ஆரம்ப விலைகளைப் பார்த்துவிடுவோம். ஐபோன் 17-ன் ஆரம்ப விலை 82,900 ரூபாய். புதிய ஐபோன் 17 ஏர் மாடலின் ஆரம்ப விலை 1,19,900 ரூபாய். அதே சமயம், உயர் ரக மாடல்களான ஐபோன் 17 ப்ரோ 1,34,900 ரூபாயிலிருந்தும், ஐபோன் 17 ப்ரோ மேக்ஸ் 1,49,900 ரூபாயிலிருந்தும் தொடங்குகின்றன.
சரி, இதே மாடல்கள் அமெரிக்காவில் என்ன விலையில் விற்கப்படுகின்றன? அங்கே, ஐபோன் 17-ன் விலை 799 டாலர்களிலிருந்தும், ஐபோன் 17 ஏர் 999 டாலர்களிலிருந்தும் தொடங்குகின்றன. ப்ரோ மாடல்களின் விலை, 1,099 டாலர்களிலிருந்தும், ப்ரோ மேக்ஸ் 1,199 டாலர்களிலிருந்தும் ஆரம்பமாகின்றன.
இப்போது, அமெரிக்க டாலர் விலையை இந்திய ரூபாய்க்கு மாற்றி ஒரு சின்ன ஒப்பீடு செய்யலாம். அமெரிக்காவில் ஐபோன் 17-ன் விலை சுமார் 70,300 ரூபாய் ஆகிறது. ஆனால், இந்தியாவில் இதன் விலை 82,900 ரூபாய். கிட்டத்தட்ட 12,600 ரூபாய் வித்தியாசம். இந்த வித்தியாசம், உயர் ரக மாடல்களில் இன்னும் அதிகமாகிறது. உதாரணமாக, ஐபோன் 17 ப்ரோ மேக்ஸ் மாடலை, அமெரிக்காவில் சுமார் 1,05,500 ரூபாய்க்கு வாங்க முடியும். ஆனால், இந்தியாவில் அதன் விலை 1,49,900 ரூபாய். அதாவது, சுமார் 44,400 ரூபாய் வரை சேமிக்க முடியும்.
ஏன் இந்த பெரிய விலை வித்தியாசம் என்று கேட்டால், அதற்கு முக்கிய காரணம், இந்தியாவில் விதிக்கப்படும் இறக்குமதி வரிகளும், உள்ளூர் வரிகளும்தான். இந்த வரிகள்தான், அமெரிக்க விலையை விட, இந்திய விலையை இவ்வளவு அதிகமாக உயர்த்துகிறது.
விலையைப் பொறுத்தவரை, அமெரிக்காவில் வாங்குவதுதான் லாபம். ஆனால், சில விஷயங்களை நீங்கள் கவனத்தில் கொள்ள வேண்டும். அமெரிக்காவில் வாங்கும் ஐபோனுக்கு, இந்தியாவில் சர்வதேச வாரண்டி கிடைக்குமா என்பதை உறுதி செய்துகொள்ள வேண்டும். மேலும், உங்கள் நண்பர்கள் அல்லது உறவினர்கள் மூலமாக வாங்கும்போது, நம்பகத்தன்மை ஒரு முக்கியப் பங்கு வகிக்கிறது.
மொத்தத்தில், உங்களுக்கு அமெரிக்காவில் இருந்து வாங்கி வர ஆள் இருந்தால், நீங்கள் கணிசமான பணத்தைச் சேமிக்கலாம். இல்லை என்றால், இந்தியாவில் வாங்குவதே பாதுகாப்பானது.