யூடியூப் பார்த்து உடல் எடையை குறைக்க முயன்ற மாணவருக்கு நேர்ந்த பரிதாபம்

கன்னியாகுமரி மாவட்டம் குளச்சல் பகுதியை சேர்ந்த சக்தீஷ்வர் என்ற 17 வயது மாணவர் பிளஸ்-2 தேர்ச்சி பெற்று என்ஜினீயரிங் கல்லூரியில் சேர தயாராகி வந்தார். மாணவன் சக்தீஷ்வர் உடல் பருமனால் அவதியுற்று வந்துள்ளார்.

கல்லூரிக்கு சென்றால் சக மாணவர்கள் கேலி செய்வார்கள் என நினைத்த அவர் உடல் பருமனை குறைக்கும் முயற்சியில் ஈடுபட்டுள்ளார். உடல் எடையை குறைக்கும் வழிமுறைகள் குறித்து யூடியூபில் தேடியுள்ளார். அதில் கிடைத்த தகவலின்படி கடுமையான உணவு கட்டுப்பாடுகளை கடைபிடித்து வந்துள்ளார்.

கடந்த 3 மாதங்களாக திட உணவு சாப்பிடாமல் பழச்சாறு மட்டும் குடித்து உடற்பயிற்சி செய்து வந்துள்ளார். தொடர்ந்து பழச்சாறு குடித்து வந்ததால் சளித் தொல்லைக்கு ஆளாகி மூச்சு விட சிரமப்பட்டு உள்ளார். நேற்று காலையில் அதிக சளி தொல்லையால் மூச்சு திணறல் ஏற்பட்டு உயிரிழந்துள்ளார்.

யூடியூப் பார்த்து உடல் எடையை குறைக்க முயன்ற மாணவர் இறந்த சம்பவம் அந்த பகுதியில் சோகத்தை ஏற்படுத்தியுள்ளது.