இந்தியாவில் இன்றும் சில பகுதிகளில் நமக்கு 3ஜி, 4ஜி போன்ற சேவைகள் சீராகப் பணியாற்றாமலே உள்ளன. 5ஜி சேவையும் இடைவெளிகளுடன், திருப்திகரமில்லாமல் செயல்படுகிறது. இந்த நிலையில், உலகை வியக்க வைக்கும் வகையில் சீனா மிக அதிவேகமான 10ஜி இணைய சேவையை அறிமுகப்படுத்தியுள்ளது.
இன்றைய உலகத்தில் இணையம் என்பது சாதாரண வசதியல்ல. அது வாழ்வின் ஒரு அவசியமாகவே மாறியுள்ளது. பணம் பரிமாற்றம், வீடியோ அழைப்பு, ஆன்லைன் வகுப்புகள், வணிகம், பொழுதுபோக்கு என அனைத்திற்குமே அதிவேக இணைய சேவை தேவைப்படுகின்றது. இந்த தேவையை உணர்ந்த சீனா, தொழில்நுட்பத்தில் ஒரு புதிய மைல்கல்லை எட்டியுள்ளது.
ஹூவாய் (Huawei) என்ற பிரபல சீன நிறுவனமும், சீன யூனிகாம் என்ற அரசு நிறுவனமும் இணைந்து, ஹூபே மாகாணத்தில் உள்ள சுனான் கவுண்டி எனும் பகுதியில் முதற்கட்டமாக இந்த 10ஜி சேவையை தொடங்கியுள்ளனர்.
இந்த 10ஜி இணைய வேகம் சாதாரண ஒன்றல்ல. நொடிக்கு 9,834 மெகா பைட்டுகள் என்ற அதிவேகத்தை இந்த சேவை அளிக்கிறது. இதன் மூலம், சுமார் 2.5 ஜிபி அளவுள்ள நான்கு தமிழ் திரைப்படங்களை, ஒரே நொடியில் பதிவிறக்கம் செய்ய முடியும் என்பதுதான் இதன் வலிமை!
இதற்குப் பின்னால் உள்ள முக்கியமான தொழில்நுட்பம் – 50G PON எனப்படும் பாசிவ் ஆப்டிகல் நெட்வொர்க். இது ஒளிக்கொடி வழியாக தரவுகளை பரிமாற்றும் முறை. இதனால் லேடன்சி எனப்படும் தாமத நேரம் வெகு குறைவாக இருக்கும் — வெறும் சில மில்லி விநாடிகள் மட்டுமே. இதன் பயனாக, நேரடி வீடியோ அழைப்புகள், விரைவு பதில்கள் தேவைப்படும் VR/AR உலகங்கள் அனைத்தும் ஒளிப்படமாக செயல்படக் கூடியவையாகிறது.
அதுமட்டுமல்ல, இந்த 10ஜி சேவையில் 1,008 மெகா பைட்டுகள் வரை அப்லோடு வேகமும் கிடைக்கிறது. இதன் மூலம் பெரிய வீடியோக்கள், கணிப்பு தரவுகள், திரட்டல்களையும் ஒரே நொடியில் பகிர முடியும்.
இவ்வளவு திறம்பட இருக்கிற இந்த 10ஜி சேவையிலும், சில சர்ச்சைகள் மறைந்துள்ளன. சீன அரசு சார்பாக இயங்கும் நிறுவனங்கள் இதில் பங்கெடுத்து இருப்பதால், தகவல் களவு, சைபர் பாதுகாப்பு குறித்த சந்தேகங்களும் எழுந்துள்ளன. ஏற்கனவே 2018 ஆம் ஆண்டு அமெரிக்கா, ஹூவாவே நிறுவனத்திற்கு தடை விதித்திருந்தது. இந்நிலையில், இந்த 10ஜி தொழில்நுட்பத்தையும் சில நாடுகள் கட்டுப்படுத்தும் வாய்ப்புகள் உள்ளன.
இருப்பினும், தொழில்நுட்ப ரீதியில் இதை ஒரு பெரிய முன்னேற்றமாகவே பார்க்கவேண்டும். இணைய வேகத்தில் ஒரு புதிய அதிர்வலைகளை ஏற்படுத்தும் சீனாவின் இந்த முயற்சி, உலக நாடுகளையும் இதேபோன்று முன்னேற வைக்கும் தள்ளுபடியாக அமையக்கூடும்.
நாம் ஒருகாலத்தில் ஒரு பாட்டை டவுன்லோடு செய்ய அரை மணி நேரம் காத்திருந்த நாட்களைக் நினைத்துப் பாருங்கள்! இன்று, ஒரே நொடியில் நான்கு திரைப்படங்கள்? இதுதான் தொழில்நுட்பத்தின் அசாதாரண வளர்ச்சி!